Marneulidə Zəfər Gününə həsr olunan bukletlər şəhər sakinlərinə paylanılıb
8 Noyabr – Zəfər Gününün beşinci ildönümü münasibətilə Gürcüstanın Marneuli şəhərinin sakinlərinə bukletlər paylanılıb.
Crossmedia.az xəbər verir ki, bukletlər Azərbaycan Respublikası Diasporla İş üzrə Dövlət Komitəsinin tabeliyindəki Azərbaycan Diasporuna Dəstək Fondunun dəstəyi və “Alyans” Gənclər Mərkəzinin təşkilatçılığı ilə Azərbaycan və gürcü dillərində hazırlanıb.
Gürcüstan Azərbaycanlılarının İnteqrasiya Mərkəzinin (GAİM) keçirdiyi aksiyanın məqsədi 2020-ci ilin 27 sentyabrında başlayan, 44 gün davam edən və Azərbaycan işğal altındakı torpaqlarının azadlığı ilə nəticələnən Vətən müharibəsinin tarixi əhəmiyyətini Marneuli ictimaiyyətinə, o cümlədən gürcü cəmiyyətinə çatdırmaq olub.
GAİM-in rəhbəri Murad Muradov Vətən müharibəsinin Azərbaycan tarixinin ən şanlı səhifələrindən biri olduğunu və bu Qələbənin Azərbaycan xalqının iftixar mənbəyinə çevrildiyini bildirib. O vurğulayıb ki, xalqın Müzəffər Ali Baş Komandan İlham Əliyevin ətrafında “dəmir yumruq” kimi birləşməsi şanlı Zəfəri doğuran vacib amillərdəndir.
Paylanılan bukletlərdə 44 günlük Vətən müharibəsindən, Şuşa şəhərinin və digər torpaqlarımızın işğaldan azad edilməsindən bəhs olunur. Burada, həmçinin şəhidlərimizin əziz xatirəsini əbədiləşdirmək məqsədilə Bakıda yaradılan Vətən Müharibəsi Memorial Kompleksi və Zəfər muzeyi haqqında məlumat verilir. Eyni zamanda işğal dövründə ermənilərin törətdiyi vandalizm aktlarına da toxunulur.
Şəhər sakinləri aksiyanı böyük maraqla qarşılayıblar.
14:20 26.11.2025
Oxunuş sayı: 745
