“Vətəndaş Müqaviləsi” Vaqarşapat seçkilərində qalib gəldi
Ermənistanda hakim “Vətəndaş Müqaviləsi” partiyası Armavir vilayətinin böyüdülmüş Vaqarşapat icmasında (buraya Eçmiədzin, Xoy və Voskeat yaşayış məntəqələri daxildir) Ağsaqqallar Şurasına keçirilən seçkilərdə qalib gəlib.
Crossmedia.az xarici mətbuata istinadən xəbər verir ki, Ermənistanın baş naziri Nikol Paşinyan seçicilərə müraciət edərək, partiyasının Vaqarşapatdakı qələbəsini katolikos II Qareginin hakimiyyətdən uzaqlaşdırılması üçün verilmiş mandat kimi qiymətləndirib.
“Hörmətli Vaqarşapatın böyüdülmüş icmasının seçiciləri! Mən siz hamınıza dərin ehtiramımı bildirir və ilk növbədə demokratik seçkilərin keçirilməsi münasibətilə sizi təbrik edirəm.
Siz öz seçiminizlə bir neçə mühüm məqamı təsdiqlədiniz:
1. Siz “Vətəndaş Müqaviləsi” partiyasının namizədi Argişti Mehakoviç Mehakyanı icmanın rəhbəri seçərək, Ermənistan Respublikasının sülh içində, firavan və demokratik inkişafının şəhidlərimizin xatirəsini əbədiləşdirməyin ən yaxşı yolu olduğunu təsdiqlədiniz.
2. Siz dövlətçiliyimizin, müstəqilliyimizin, suverenliyimizin və azadlığımızın möhkəmləndirilməsi istiqamətində “Vətəndaş Müqaviləsi” partiyasının strategiyasına sarsılmaz dəstək göstərdiniz.
3. Siz bu seçki ilə müqəddəslərin müqəddəsi – İlk Taxt Eçmiədzinin Ktriç Nersisyanın təsirindən azad edilməsi prosesinə mühüm təkan verdiniz.
4. Siz əvvəlki dövrdə icmanızda “Vətəndaş Müqaviləsi” partiyasının fəaliyyətini yüksək qiymətləndirdiniz və buraxılmış səhvləri bağışladınız. Mən bu səhvlərə görə hamınızdan üzr istəyirəm.
Vaqarşapatın böyüdülmüş icmasının rəhbəri seçilən Argişti Mehakyanı təbrik edirəm və Vaqarşapat sakinlərini təvazökar, lakin səmərəli Mehakyanın icra başçısı vəzifəsinə seçilməsi münasibətilə təbrik edirəm.
“Vətəndaş Müqaviləsi” partiyasındakı bütün həmkarlarımı təbrik edirəm, Ermənistan Respublikasının bütün vətəndaşlarını 2026-cı il ümummilli seçkilərinin bu parlaq başlanğıcı münasibətilə ürəkdən təbrik edirəm.
Ermənistan Respublikasının xalqı 2026-cı ildə keçiriləcək parlament seçkilərində qalib gələcək”, — deyə Paşinyan bildirib.
Pərvin Hacıyeva
12:30 17.11.2025
Oxunuş sayı: 1188
