İran- Rusiya münasibətlərində səssiz inamsızlıq: strateji tərəfdaşlıqda dərin çatlar
“Donya-e-eqtesad” saytı “Al-Monitor”un təhlilinə istinad edərək İran və Rusiya arasında inamsızlığın və ehtiyatlı əməkdaşlığın hökm sürdüyünü yazıb.
Crossmedia.az-ın məlumatına görə, məqalədə qeyd olunur ki, İranın siyasi elitasında Kremlə münasibət kəskin şəkildə bölünmüş vəziyyətdədir: islahatçılar və mühafizəkarlar Rusiyanı yalnız öz maraqları üçün İrandan istifadə edən, onu Qərblə qarşıdurmada alətə çevirən "eqoist güc" kimi dəyərləndirirlər.
Strateji əməkdaşlığa baxmayaraq, Tehranda Moskva ilə münasibətlərin uzunmüddətli perspektivi ilə bağlı ciddi suallar yaranıb.
Bildirilib ki, İran Ali Milli Təhlükəsizlik Şurasının katibi Əli Laricaninin Moskvaya son səfəri və ardınca baş tutan diplomatik təmaslar, görünən yaxınlaşmadan daha çox, İrandakı ehtiyatlı yanaşmanın və strateji tarazlıq axtarışlarının göstəricisidir. İran, İsraillə gərginliyi azaltmağa çalışdığı bir vaxtda, Moskva ilə əlaqələrini ehtiyatla davam etdirməyə çalışır.
Qeyd olunur ki, İran diplomatiyası bir tərəfdən hərbi rəsmilərin sərt ritorikasını balanslaşdırmağa çalışır, digər tərəfdən Rusiyanın bölgədəki vasitəçi rolunu diqqətlə izləyir. Bu, xüsusilə 12 günlük müharibədən sonra regionda yaranmış kövrək status-kvo fonunda daha da aktuallaşıb.
Sitat: “Ən kritik məqamlardan biri isə budur ki, Tehran strateji tərəfdaşlıqla yanaşı, Rusiyadan asılılığa düşməmək üçün alternativ manevr imkanları axtarır. Tehran və Moskvanın münasibətləri struktur baxımından dərinləşsə də, tərəflərin bir-birinə qarşı ehtiyatlı və şübhəli yanaşması bu tərəfdaşlığın təməlindəki inamsızlığı üzə çıxarır...”.
12:42 21.10.2025
Oxunuş sayı: 7131
