Medvedev Trampın bəyanatına cavab verdi: Bu, onun üçün pis nəticələnə bilər
Rusiya Təhlükəsizlik Şurasının sədr müavini Dmitri Medvedev ABŞ-nin prezidenti Donald Trampın “əgər Rusiya prezidenti Ukrayna münaqişəsini həll etməsə, bu onun üçün pis nəticələnəcək” sözlərinə cavab verib.
Crossmedia.az bildirir ki, Medvedev Trampın bu fikirlərinə münasibət bildirərək qeyd edib: “Əgər ‘biznesmen-sülhməramlı’ ‘Tomahawk’ raketlərindən danışırsa, bu, düzgün ifadə deyil. Bu raketlərin göndərilməsi hər kəs üçün, ilk növbədə isə Trampın özü üçün pis nəticələnə bilər".
O xatırladıb ki, artıq dəfələrlə izah edilib — “Tomahawk” raketlərinin nüvə versiyasını adi versiyadan uçuş zamanı ayırmaq mümkün deyil. Belə raketlərin buraxılışı Kiyev tərəfindən deyil, ABŞ tərəfindən zərbə kimi qəbul ediləcək.
“Rusiya buna necə cavab verməlidir? Məhz elə həmin şəkildə,” — deyə Medvedev vurğulayıb.
Sonda o əlavə edib ki, ümid qalır ki, bu, sadəcə növbəti “boş hədə”dir və “uzanan danışıqlardan bezmiş kokaindən asılı klounun” təsiri ilə deyilmiş sözlərdir.
Mehriban Yariyeva
12:52 13.10.2025
Oxunuş sayı: 8429
