Suriya və İsrail arasında təhlükəsizlik sazişi bağlamaq cəhdləri uğursuz alınıb
Suriya ilə İsrail arasında təhlükəsizlik sazişi bağlamaq cəhdləri son anda uğursuzluğa düçar olub.
Crossmedia.az xəbər verir ki,buna səbəb İsrailin Suriyanın cənubundakı Əs-Suveyda əyalətində druzlar üçün humanitar dəhliz açmaq tələbi olub.
Mənbənin məlumatına görə, Parisdə keçirilən əvvəlki danışıqlar zamanı İsrail tərəfi yardımın çatdırılması üçün Əs-Suveydaya quru yolu yaradılmasında israr edib. Lakin rəsmi Dəməşq bunu suverenliyin pozulması kimi qiymətləndirərək təklifi rədd edib. Bu şərtin dəfələrlə irəli sürülməsi müqavilənin imzalanması planlarının iflasa uğramasına səbəb olub.
Məlumata görə, son aylarda tərəflər ABŞ-nin vasitəçiliyi ilə Bakıda, Parisdə və Londonda bir sıra görüşlər keçirib. Nyu Yorkda keçirilən BMT Baş Assambleyası ərəfəsində danışıqlar intensivləşib və Suriya ilə İsrail paktın əsas parametrləri üzrə razılığa gəlməyə yaxınlaşıb.
Razılaşma iyul ayında yerli druzlarla hökumət qüvvələri arasında toqquşmaların baş verdiyi Əs-Suveyda əyalətini də əhatə edən demilitarizasiya zonasının yaradılmasını nəzərdə tuturdu.
23:16 04.10.2025
Oxunuş sayı: 6642
