Şamaxıdan sonra 3-cü Nəsimi – şeir, mənəviyyat və incəsənət festivalı yenidən Bakıya dönüb.
Crossmedia.az xəbər verir ki, festival iştirakçıları orta əsr Аzərbаycаn mеmаrlığının mоnumеntаl dеkоrаtiv sənətinin möhtəşəm nümunəsi sayılan Şirvanşahlar Sarayı Kompleksində Bakuvi məqbərəsinin qarşısına toplaşıb.
İçərişəhərin tarixi abidəsi önündə Nəsiminin “Məst” qəsidəsi əsasında qoyulmuş “Məst-i Dərviş” tamaşası təqdim edilib. Tamaşanın ssenari müəllifi İlqar Fəhmi, rejissoru isə Bəhruz Vaqifoğludur.
Bir saat ərzində İçərişəhərin qədim divarları və küçələri Nəsiminin qəzəllərinə qərq olub. Həmin qəzəllər Nəsimi yaradıcılığına xas olan insan-Tanrı münasibətləri, insanın Tanrının bir zərrəsi olması, onun həyatda, cəmiyyətdə mövqeyi, bu dünyaya təsadüfi deyil, xüsusi missiya ilə gəlməsi fikrini vurğulayır.
Həmin gün Bayıl daşları ərazisində isə “Eşq-i nur” layihəsi təqdim edilib. Əməkdar rəssam və kurator Səbinə Şıxlinskayanın mentorluğu, həmçinin müasir Azərbaycan rəssamları və kuratorlarının iştirakı ilə hazırlanan bu layihə insan varlığının ən dərin qatlarını əks etdirən anlayışlardan üç ideya: eşq, işıq və işarə ətrafında qurulmuş metafizik səfərdir. Bu səfər təsviri incəsənət əsərlərindən, canlı ekspozisiyalarsan, monitorda nümayiş olunan ideyalardan ibarətdir. Məqsəd eşqi yalnız romantik və ya emosional bir hal deyil, əksinə, mövcudluğun əsasında duran bir mənəvi çağırış, ilahi cazibə kimi təqdim etməkdir.
Burada nümayiş etdirilən layihələrdən biri də Lenay Seyidəlizadənin “Sözün soyundurulması” adlı təqdimatıdır. Təqdimat həqiqəti bədənində daşıyan bir insan haqqındadır: dərisi soyulur, amma sözü qalır.
Nəzrin Məmmədova isə Nəsiminin qəzəllərinin muğamla, elektron musiqi ilə sintezini təqdim edib.
Qeyd edək ki, Nəsimi Festivalının bağlanışı mərasimi “Atəşgah Məbədi” Tarixi-memarlıq qoruğunda “Savalan” qrupunun ifasında Nəsimi irsinə həsr olunmuş spiritual-irfani musiqili ədəbi-bədii gecə ilə olacaq.
