Bakı-Tbilisi-Ceyhan boru kəməri ilə nəql olunan neftin həcmi açıqlanıb
Bu ilin yanvar-avqust aylarında Bakı-Tbilisi-Ceyhan (BTC) ilə nəql olunan tranzit neftinin həcmi 18,356 milyon ton təşkil edib.
Bu barədə Crossmedia.az Dövlət Statistika Komitəsindən məlumat əldə edib.
Məlumata əsasən, bu, ötən ilin eyni dövründəki göstərici ilə müqayisədə 1,034 milyon ton və ya 5,3% azdır.
Belə ki, 2024-cü ilin ilk səkkiz ayında BTC ilə 19,4 milyon ton neft nəql edilmişdi.
Dövr ərzində BTC kəməri ilə nəql edilmiş neftin 84,3 faizini və ya 15,469 milyon tonunu Azərbaycanda hasil edilən neft, 15,7%-ni və ya 2,887 milyon tonunu isə Türkmənistan və Qazaxıstandan daxil olan neft təşkil edib.
Ümumilikdə, hesabat dövründə neft boru kəməri nəqliyyatı ilə cəmi yük daşımalarının həcmi 24,566 milyon ton olub. Bu isə bir il əvvəlki göstəriciyə nisbətən 1,241 milyon ton və yaxud 4,8% azalma deməkdir.
Qeyd edək ki, Bakı-Tbilisi-Ceyhan neft kəmərinin ümumi uzunluğu 1768 km təşkil edir, 443 km Azərbaycan ərazisindən, 249 km Gürcüstan ərazisindən, 1076 km isə Türkiyə ərazisindən keçir. Boru kəmərinin inşası 2003-cü ilin aprel ayında başladılıb, 2005-ci il mayın 18-də boru kəmərinə neft yüklənib.
2002-ci ilin avqust ayında layihənin icrası üçün təsis edilmiş BTC Co. şirkətində pay bölgüsü aşağıdakı kimidir: bp (30,1 faiz), AzBTC (25 faiz), MOL (8,9 faiz), Equinor (8,71 faiz), ТРАО (6,53 faiz), Eni (5 faiz), Total (5 faiz), Itochu (3,4 faiz), Inpex (2,5 faiz), ExxonMobil (2,5 faiz) və ONGC (2,36 faiz).
12:36 12.09.2025
Oxunuş sayı: 743
