Azərbaycanın Fransadakı səfirliyinə hücum edən şəxsə verilən cəza ağırlaşdırılıb
Paris Apellyasiya Məhkəməsi 2022-ci ilin sentyabrında Azərbaycanın Fransadakı səfirliyinə hücum edən Ermənistanın “Çarjum” radikal hərəkatının üzvü Loris Tufanyanın cəzasını ağırlaşdırıb.
Crossmedia.az xarici KİV-ə istindən xəbər verir ki, məhkəmə iyunun 10-da təqdim olunmuş apellyasiya şikayətinə baxaraq bu gün qərar qəbul edib. Apellyasiya instansiyası Tufanyanı səfirliyə hücumda təqsirli bilən birinci instansiya məhkəməsinin qərarını qüvvədə saxlayıb və əlavə cəza tətbiq edib.
Yeni qərara əsasən, Tufanyana 12 ay şərti həbs cəzası verilib. Bu, əvvəlki 6 aylıq şərti cəza ilə müqayisədə daha ağır hesab olunur. Bundan əlavə, ona 5 il müddətinə icazə şərti ilə silah saxlamaq və ya gəzdirmək qadağan edilib.
Həmçinin Tufanyan ictimai istifadə üçün nəzərdə tutulmuş əmlaka qrup şəklində və ya ortaqlarla birgə ziyan vurmaqda da təqsirli bilinib. Məhkəmə bu maddə üzrə cinayətin daha ağır xarakter daşıdığını qəbul edib.
Apellyasiya instansiyası birinci instansiya məhkəməsinin mülki iddia üzrə çıxardığı – təqsirləndirilən şəxsə qarşı maddi cəzanın tətbiqi qərarını da qüvvədə saxlayıb.
20:45 08.07.2025
Oxunuş sayı: 768
