Avropa Komissiyası: HƏMAS-ın Qəzzada humanitar yardımı ələ keçirməsinə dair sübut yoxdur
Avropa Komissiyası İsrailin irəli sürdüyü ittihamlara cavab olaraq bildirib ki, Qəzza zolağına göndərilən humanitar yardımın Fələstin hərəkatı HƏMAS tərəfindən ələ keçirilməsinə dair hər hansı təsdiqlənmiş məlumat yoxdur. Bu barədə Avropa Komissiyasının böhranlara hazırlıq məsələləri üzrə nümayəndəsi Eva Hrniçirova Brüsseldə keçirilən gündəlik mətbuat konfransında açıqlama verib.
Crossmedia.az xarici mediaya istinadən bildirir ki, Hrniçirova çıxışında Qəzzadakı humanitar vəziyyətin “faciəvi” və “son dərəcə çətin” olaraq qaldığını vurğulayıb. O əlavə edib ki, Avropa İttifaqının humanitar tərəfdaşları hələ də bölgədə fəaliyyətlərini davam etdirirlər.
Avropa Komissiyasının nümayəndəsi İsraili beynəlxalq humanitar təşkilatların Qəzzaya maneəsiz girişini təmin etməyə çağırıb. Hrniçirovanın sözlərinə görə, bölgədə humanitar ehtiyaclar getdikcə artır və yardımların çatdırılmasına qarşı hər cür əngəlin aradan qaldırılması vacibdir.
Fatimə Nəbiyeva
18:18 08.07.2025
Oxunuş sayı: 809
