Sivil siyasətdən kənar ritorika: Türkiyədə daxili qarşıdurma genişlənir
Son dövrlər Türkiyənin daxili siyasətində yaşanan proseslər Azərbaycan cəmiyyətində də ciddi narahatlıqla izlənilir. Çünki Türkiyə Azərbaycan üçün sadəcə qonşu deyil – hər zaman çətin anlarında dəstək göstərən qardaş bir dövlətdir. Məhz buna görə də Türkiyədə baş verən istənilən daxili siyasi gərginlik, xüsusilə iqtidar-müxalifət qarşıdurması, Azərbaycanda da diqqətlə müşahidə olunur. Ekspertlər bu mübarizənin getdikcə daha sərtləşdiyini və artıq sivil çərçivədən kənara çıxdığını bildirirlər. Siyasi ritorikada təhqiramiz ifadələrin, qarşılıqlı hücumların artması isə cəmiyyətdə qütbləşməni dərinləşdirir və sabitliyə təhdid yaradır.
Politoloq Həşim Səhrablı Crossmedia.az-a açıqlamasında bildirib ki, Türkiyədə hazırda iqtidar və müxalifət arasında baş verən proseslər artıq sadəcə siyasi rəqabət deyil, açıq qarşıdurma forması almaqdadır: “Təəssüf ki, iqtidarın müxalifət bələdiyyələrinə yönəlmiş ardıcıl korrupsiya araşdırmaları hüquqi obyektivlik prinsipinə kölgə salır. Çünki bu cür iddialar zamanında iqtidar təmsilçiləri barəsində də səsləndirilib, lakin onlara qarşı oxşar hüquqi addımlar atılmayıb. Bu, cəmiyyətdə ikili standart düşüncəsinin formalaşmasına səbəb olur. Paralel olaraq, müxalifət liderinin – xüsusilə Özgür Özəlin – prezidentə qarşı sərt ritorikası da vəziyyəti daha da qızışdırır. Bu, siyasi etika baxımından qəbuledilməzdir və nəticədə qarşılıqlı məhkəmə iddiaları ilə proses daha da gərginləşir".
Səhrablı əlavə edib ki, bu tip gərginliklər təkcə siyasi liderlər səviyyəsində qalmır, cəmiyyətin özündə də fanatizmə səbəb olur: “Bugünkü Türkiyə cəmiyyəti faktiki olaraq iki hissəyə bölünüb – iqtidar və müxalifət tərəfdarları. Bu bölünmə sağlam demokratik rəqabətdən çox, emosional, bəzən də fanatik reaksiyalarla müşayiət olunur. Əgər liderlər bu aqressiv siyasətə 'dur' deməzlərsə, sosial partlayış riski realdır. İnsanlar küçələrə axışa, kütləvi toqquşmalar baş verə bilər. Bu, nə Türkiyə, nə də bölgə üçün arzuolunan ssenaridir".
Politoloq hesab edir ki, Türkiyənin güclü gələcəyi üçün həm iqtidar, həm də müxalifət tərəfləri dövlətin və xalqın rifahını şəxsi ambisiyalardan üstün tutmalı, siyasi ritorikanı yumşaltmalı və birliyə xidmət edən addımlar atmalıdır.
Bənövşə Zahidli
18:11 08.07.2025
Oxunuş sayı: 9742
