“Aktyorluğu öyrən” layihəsi çərçivəsində yeni diplom tamaşaları təqdim olunub
Azərbaycan Respublikası Mədəniyyət Nazirliyinin Mədəniyyət üzrə Elmi-Metodiki və İxtisasartırma Mərkəzi və Azərbaycan İncəsənət Məktəbinin birgə təşkilatçılığı ilə həyata keçirilən “Aktyorluğu öyrən” layihəsi uğurla davam edir.
Crossmedia.az xəbər verir ki, layihə çərçivəsində Azərbaycan İncəsənət Məktəbinin tələbələrindən ibarət daha bir qrupun diplom tamaşaları iyulun 7-də Şuşa Dövlət Musiqili Dram Teatrında təqdim olunub. Xalq artisti Məmmədsəfa Qasımovun quruluşunda səhnələşdirilən Anton Çexovun “Ayı” və “Elçilik” əsərləri əsasında hazırlanan tamaşalar tamaşaçılar tərəfindən maraqla qarşılanıb.
Tədbirdə Mədəniyyət üzrə Elmi-Metodiki və İxtisasartırma Mərkəzinin Təhlil, təlim və tədris şöbəsinin müdiri Cəmilə Mirzəyeva, teatrşünas Dağlar Yusif, Azərbaycan İncəsənət Məktəbinin təsisçisi Fərid Bağırov, direktoru Tural Əliyev, Xalq artisti Məmmədsəfa Qasımov, Əməkdar artist Qasım Nağı və teatrsevərlər iştirak ediblər.
Nümayişdən sonra layihə üzrə tədris proqramını uğurla başa vuran gənclərə diplomlar təqdim olunub.
Qeyd edək ki, “Aktyorluğu öyrən” layihəsinin əsas məqsədi gənclərin səhnə sənətinə marağını artırmaq, onların yaradıcılıq potensialını üzə çıxarmaq və aktyorluq ixtisası üzrə ilkin biliklərlə təmin etməkdir.
Layihə çərçivəsində dərslər Mədəniyyət üzrə Elmi-Metodiki və İxtisasartırma Mərkəzinin hazırladığı proqram əsasında, peşəkar pedaqoqlar tərəfindən aparılıb. 9 ay müddətində davam edən proqram çərçivəsində gənclər həftədə iki dəfə tədris prosesində iştirak ediblər.
Bununla yanaşı, layihə iştirakçıları peşəkar teatr və kino mühitində təcrübə qazanmaqla yanaşı, tanınmış sənətkarlarla ustad dərslərində də iştirak etmək imkanı əldə ediblər.
Xatırladaq ki, iyunun 29-da layihə çərçivəsində Pərvin Nurəliyevanın “Cırtdanino” və Aleksandr Volkovun “Zümrüd şəhərinin sehrbazı” əsərləri əsasında hazırlanan tamaşalar da nümayiş olunub.
Ayan Sədi
13:50 08.07.2025
Oxunuş sayı: 14963
