İranın sabiq diplomatı Rusiyanın silah siyasətini tənqid edib
İranın Almaniyadakı keçmiş səfiri və ölkənin nüvə proqramı üzrə sabiq danışıqlarçısı Səyyid Hüseyn Musəvian Rusiya ilə hərbi əməkdaşlıq məsələsində Tehran üçün ikili standartların tətbiq olunduğunu bildirib.
Crossmedia.az xarici mediaya istinadən bildirir ki, Musəvianın sözlərinə görə, Rusiya İrana nə Su-35 qırıcılarını, nə də S-400 zenit-raket komplekslərini təqdim edib. Halbuki İran onilliklərdir ki, ABŞ və İsrail kimi nüvə dövlətləri tərəfindən təhdid altındadır və son nəticədə həmin dövlətlərin hücumuna məruz qalıb.
Musəvian əlavə edib ki, Rusiya bunun əvəzində ABŞ-nin müttəfiqi olan Hindistana 117 ədəd Su-35M təyyarəsi təklif edib və Su-57 qırıcılarının birgə istehsalına razılıq verib. Bu razılaşma çərçivəsində Hindistana tam texnologiya transferi də nəzərdə tutulub.
O qeyd edib ki, Moskva beynəlxalq siyasətdə öz strateji maraqlarına əsasən davranır. Musəvianın fikrincə, əgər NATO üzvü olan Türkiyə və ya ABŞ-a yaxın olan Səudiyyə Ərəbistanı Su-35, Su-57 və ya S-400 sistemlərini almaq istəsəydi, Rusiya buna müsbət cavab verərdi.
İranlı diplomat hesab edir ki, bu cür yanaşma Tehrana beynəlxalq münasibətlərin real məzmununu və milli maraqların əsl mahiyyətini daha yaxşı anlamağa imkan yaradır.
Fatimə Nəbiyeva
10:22 08.07.2025
Oxunuş sayı: 8156
