Chatham House: “İran Türkiyə-Azərbaycan-İsrail ittifaqının yaranmasından narahatdır”
Britaniyanın nüfuzlu “Chatham House” analitik mərkəzinin yaydığı təhlildə İranın, Türkiyə, Azərbaycan və İsrail arasında regionun güc balansını dəyişə biləcək strateji ittifaqın formalaşmasından ciddi narahatlıq keçirdiyi bildirilir.
Crossmedia.az xəbər verir ki, bu barədə təhlildə qeyd olunub.
Təhlildə qeyd olunana görə, Azərbaycanın Suriyadakı gərginliyin azaldılması istiqamətində Türkiyə və İsrail arasında diplomatik vasitəçi rolunu üzərinə götürməsi İran rəhbərliyində əlavə narahatlıq yaradıb.
Bildirilib ki, Rusiya-Ukrayna müharibəsindən sonra Moskvanın bölgədə zəifləyən təsiri İran üçün əlavə çətinliklər yaradır. Rusiya artıq Türkiyənin maraqlarını daha çox nəzərə almağa meyllidir və xüsusilə 2020-ci ildə baş verən İkinci Qarabağ müharibəsindən sonra Cənubi Qafqazda Ankaranın artan nüfuzunu qəbul edib.
Suriyada isə Əsəd rejimi ilə bağlı vəziyyət dəyişdikcə, Moskva hərbi və siyasi mövcudluğunu qorumaq üçün Türkiyə ilə əməkdaşlığı önə çıxarıb. Bu dəyişən geosiyasi mənzərədə İran əvvəllər Rusiya ilə birgə təsir göstərdiyi regionda kənarda qalmaq təhlükəsi ilə üz-üzədir.
Məqalədə vurğulanır ki, Tehran bu tendensiyaları öz milli təhlükəsizliyi və regiondakı nüfuzu üçün uzunmüddətli fəsadlar doğura biləcək geosiyasi böhran kimi qiymətləndirir.
23:05 07.07.2025
Oxunuş sayı: 1230
