Yapon adalarında kütləvi təxliyə: İki həftəyə 1 illik zəlzələ baş verdi
Yaponiyanın cənubundakı adalarda iyunun 21-dən bəri 1 600-ə yaxın zəlzələ qeydə alınıb. Sarsıntılar səbəbilə adalarda yaşayan onlarca insan bölgədən təxliyə olunub.
Crossmedia.az xarici KİV-ə istinadən xəbər verir ki, zəlzələlərin əsas təsir etdiyi Aquseski adasında son olaraq gecə saatlarında 5,1 bal gücündə zəlzələ baş verib. Bu barədə Kaqoşima şəhərinin meri Geniciro Kubo məlumat verib. Onun sözlərinə görə, güclü təkanlara baxmayaraq, adada böyük fiziki dağıntı qeydə alınmayıb.
Ancaq fasiləsiz davam edən sarsıntılar yerli əhalidə ciddi narahatlıq və psixoloji gərginlik yaradıb. Bir çox sakin yuxusuzluqdan və daimi stresdən şikayətlənib.
Su altındakı vulkan aktivliyi ehtimal edilir.
Kubo jurnalistlərə açıqlamasında bildirib ki, Aquseskidə yaşayan 89 nəfərdən 44-ü artıq Kaqoşima bölgə mərkəzinə köçürülüb, 15 nəfər isə yaxınlıqdakı digər adalara sığınıb. Ümumilikdə bölgə 12 adadan ibarətdir – onların 7-də yaşayış var, 5-i isə insan məskunlaşmasından kənardır. Bu adalar Kaqoşimadan təxminən 11 saatlıq bərə məsafəsində yerləşir.
Mütəxəssislər bildirirlər ki, bölgədə bu qədər çox zəlzələnin səbəbi su altındakı vulkanın aktivliyi və magma axınları ola bilər.
Kubo gələcək barədə danışarkən belə deyib: “Nə baş verəcəyini və nə vaxt sona çatacağını proqnozlaşdırmaq mümkün deyil”.
Yaponiya Meteorologiya Agentliyinin məlumatına görə, bölgədə buna bənzər son sismik fəallıq 2023-cü ilin sentyabrında qeydə alınmışdı – həmin dövrdə 346 zəlzələ baş vermişdi. Ümumilikdə, hər il Yaponiyada 1 500-ə yaxın zəlzələ baş verir və bu, dünyadakı zəlzələlərin təxminən 18 faizini təşkil edir.
Mədinə Cəlilova
00:00 08.07.2025
Oxunuş sayı: 7774
