Trampın “Qızıl Kart” planı hüquqi maneələrlə qarşılaşıb
ABŞ Prezidenti Donald Trampın 5 milyon dollar investisiya qarşılığında imkanlı əcnəbilərə viza verilməsini nəzərdə tutan “Qızıl Kart” planının hüquqi baxımdan reallaşdırılmasının mümkün olmayacağı bildirilir.
Crossmedia.az xəbər verir ki, “The Washington Post”qəzetinin yaydığı məlumata görə, Tramp və komandası bu proqramın hüquqi əsaslarla həyata keçirilə biləcəyini iddia etsə də, bunun üçün zəruri qanuni dəyişikliklərin edilməsi istiqamətində hər hansı konkret addım atılmayıb. Hüquqşünaslar isə ABŞ prezidentinin təkbaşına yeni viza kateqoriyası yaratmaq səlahiyyətinin olmadığını, bunun yalnız Konqresin qərarı ilə mümkün olduğunu bildirirlər.
Ekspertlər Trampın təklif etdiyi bu sistemin ölkədə mövcud olan immiqrasiya siyasəti ilə ziddiyyət təşkil etdiyini vurğulayırlar. Tramp administrasiyası yanvar ayından bəri ABŞ-də miqrantlara qarşı genişmiqyaslı həbslər və deportasiya tədbirləri həyata keçirir. Tənqidçilər isə bildirirlər ki, Trampın bu təşəbbüsü ABŞ-yə giriş hüququnu “satışa çıxarılmış mal” halına gətirərək ölkənin fundamental dəyərləri ilə ziddiyyət təşkil edir.
ABŞ Ticarət naziri Hovard Lutnik daha əvvəl verdiyi açıqlamada “Qızıl Kart” planının mövcud “EB-5” investisiya vizasının yerini alacağını bildirmişdi. Lakin hüquqşünaslara görə, hazırda EB-5 vizası üçün müraciət edən on minlərlə insanın növbədə olduğu şəraitdə bu şəxsləri kənarda qoyub yalnız varlı şəxslərə üstünlük verilməsi hüquqi baxımdan problemlər yarada bilər.
ABŞ-nin keçmiş Prezidenti Co Bayden dövründə Miqrasiya və Vətəndaşlıq Xidmətləri idarəsinin baş müşaviri olmuş Doq Rend bildirib ki, 1990-cı ildən bəri heç bir administrasiya yaşıl kart və digər viza kateqoriyalarına dair əsas qanunvericiliyə dəyişiklik etməyib. O, “Bunun üçün heç bir hüquqi zəmin yoxdur. Əgər yenə də bu addımı atsalar, məhkəmə prosesi qaçılmaz olacaq və uduzmaq ehtimalları çox yüksəkdir”,- deyə vurğulayıb.
Hüquqi maneələrin mövcudluğu miqrasiya hüququ üzrə çalışan vəkillərin də müştərilərini bu proqramdan uzaq durmağa çağırmasına səbəb olub. Vəkil Ron Klasko bildirib ki, Kanada və Avropadan olan bəzi müştəriləri “Qızıl Kart”la maraqlansa da, o, həmin şəxslərə “hazırda növbəyə düşməyin ciddi bir fayda verməyəcəyini” izah edib.
Bütün bu qeyri-müəyyənliyə baxmayaraq, ABŞ Ticarət naziri iyun ayında “The Financial Times” qəzetinə verdiyi açıqlamada təxminən 70 min nəfərin bu kart barədə ətraflı məlumat almaq üçün maraq göstərdiyini bildirib.
Qeyd edək ki, ABŞ Ali Məhkəməsinin mövcud hüquqi presedentləri immiqrasiya məsələlərində Konqresin “mütləq səlahiyyətə” sahib olduğunu təsdiqləyir. Bu baxımdan Trampın Konqresin təsdiqi olmadan belə bir proqramı həyata keçirməsi olduqca şübhəli hesab olunur.
Mədinə Cəlilova
22:35 07.07.2025
Oxunuş sayı: 5874
