Peruda 3 min 500 illik qədim şəhər aşkar edilib
Perunun şimalında yerləşən Barranka bölgəsində eramızdan əvvəl 1800–1500-cü illərə aid qədim şəhər qalıqları aşkarlanıb. “Peniko” adlandırılan bu yaşayış məskəninin Sakit okean sahilində yaşayan icmalarla And dağları və Amazon hövzəsindəki yerli xalqları birləşdirən mühüm ticarət mərkəzi olduğu düşünülür.
Paytaxt Limadan təxminən 200 kilometr şimalda, dəniz səviyyəsindən 600 metr yüksəklikdə yerləşən Penikonun dünyanın ilk böyük sivilizasiyalarının — Mesopotamiya, Misir, Hindistan və Çin mədəniyyətlərinin yüksəlişi dövründə formalaşdığı ehtimal olunur.
Crossmedia.az xarici mediaya istinadən xəbər verir ki, aparılan səkkiz illik qazıntı və tədqiqat işləri nəticəsində Penikoda 18 müxtəlif tikili aşkarlanıb. Arxeoloji qazıntılar zamanı gil fiqurlar, insan və heyvan təsvirləri, dəniz qabıqlarından hazırlanmış boyunbağılar kimi dini ayinlərdə istifadə olunan əşyalar tapılıb. Bu tapıntılar ərazinin yalnız ticarət deyil, eyni zamanda dini və mədəni mərkəz olduğunu da göstərir.
Amerika qitəsinin məlum olan ən qədim sivilizasiyası sayılan Karal şəhərindən cəmi qısa məsafədə yerləşən Peniko, tədqiqatçılar üçün xüsusi maraq doğurur. 1990-cı illərdə Karal şəhərində aparılan qazıntılara rəhbərlik etmiş və hazırda Peniko layihəsinə rəhbərlik edən arxeoloq Dr. Rut Şadi bu kəşfin Karal sivilizasiyasının süqutundan sonra əhalinin hara köç etdiyini anlamaq baxımından əhəmiyyətli olduğunu bildirib. Onun sözlərinə görə, Peniko “sahil, dağ və meşə icmaları ilə ticarət əlaqələri üçün strateji mövqedə” yerləşib.
Mədinə Cəlilova
03:00 08.07.2025
Oxunuş sayı: 7953
