Gəncə Dövlət Milli Dram Teatrında “M.S.S” tamaşasının premyerası keçirilib
Prezident İlham Əliyevin “Azərbaycan peşəkar milli teatrının 150 illik yubileyinin qeyd edilməsi haqqında” sərəncamının icrası çərçivəsində respublikanın 5 teatrında kadr probleminin aradan qaldırılması məqsədilə teatr-studiyaları yaradılıb.
Crossmedia.az xəbər verir ki, həmin sərəncama əsasən Gəncə Dövlət Milli Dram Teatrının nəzdində “İkinci nəfəs” teatr-studiyası fəaliyyətə başlayıb. Tədris müddətində tələbələr teatr sənətinin sirlərinə yiyələnərək həm nəzəri, həm də praktiki biliklər qazanmış, eyni zamanda görkəmli teatr xadimlərinin ustad dərslərində və seminarlarında iştirak etmişlər.
Tədrisin yekun qiymətləndirilməsi və hesabat tamaşasının hazırlanması məqsədilə teatra dəvət olunmuş istedadlı gənc rejissor Fuad Cavadzadənin quruluşunda Əməkdar incəsənət xadimi Əli Əmirlinin “M.S.S” pyesi əsasında eyniadlı tamaşa hazırlanaraq teatrsevərlərin ixtiyarına verilib.
Yeni səhnə əsərinin quruluşçu rəssamı Mirzə Mehdi, musiqi tərtibatı isə Zaur Rəşidov və Elşən Cəfərova məxsusdur. Tamaşada “İkinci Nəfəs” teatr-studiyasının tələbələri ilə yanaşı teatrın aktrisaları Zəminə Cəfərova və Sevinc Hüseynova da çıxış ediblər.
Tamaşa uğurla qarşılanaraq teatrın repertuarına daxil edilmişdir.
Ayan Sədi
18:57 01.07.2025
Oxunuş sayı: 1305
