Nizami Gəncəviyə həsr olunmuş poema London İqlim Həftəsində təqdim olundu
Nizami Gəncəvi Beynəlxalq Mərkəzinin üzvü, BMT Baş Assambleyasının sabiq prezidenti xanım Maria Fernanda Espinoza London İqlim Həftəsi çərçivəsində keçirilən yüksək səviyyəli tədbirdə Azərbaycanın dahi mütəfəkkiri Nizami Gəncəviyə həsr olunmuş və təbiətlə insanın harmoniyasını əks etdirən xüsusi poemasını təqdim edib.
Bu barədə Crossmedia.az Nizami Gəncəvi Beynəlxalq Mərkəzinə istinadən xəbər verir.
Maria Fernanda Espinoza təqdimatdakı çıxışında deyib: “Nizami Gəncəvi əsərlərində insanın təbiət qarşısındakı məsuliyyətini və kainatla harmoniyada yaşamaq zərurətini dərin fəlsəfi düşüncə ilə ifadə edirdi. Onun bu mesajları bu gün iqlim böhranı dövründə xüsusi aktuallıq kəsb edir.”
London İqlim Həftəsi qlobal iqlim gündəliyinin formalaşdırılmasında aparıcı platformalardan biridir. Hökumət nümayəndələri, beynəlxalq təşkilatlar, biznes liderləri və vətəndaş cəmiyyətinin iştirak etdiyi bu həftə iqlim dəyişikliyi ilə mübarizədə birgə səylərin vacibliyini ön plana çıxarır.
Nizami Gəncəvi Beynəlxalq Mərkəzi artıq ikinci ildir ki, London İqlim Həftəsinin tərəfdaşı kimi bu mühüm qlobal platformada iştirak edir. Mərkəz iqlim diplomatiyasının gücləndirilməsi, COP29 zamanı Azərbaycanda əldə olunmuş təcrübənin paylaşılması və COP30 prosesinə töhfə verilməsi istiqamətində öz rolunu genişləndirməkdədir.
Xanım Espinozanın təqdim etdiyi poema, yalnız poetik bir əsər deyil, həm də çağırışdır - insanın təbiətlə yenidən barışması, gələcək nəsillər üçün dayanıqlı həyat tərzinin təmin olunması məqsədilə birgə məsuliyyətə dəvətdir.
04:19 27.06.2025
Oxunuş sayı: 10676
