Azərbaycan bu ölkə ilə hərbi əməkdaşlığı genişləndirir - Ermənistan qorxu içindədir
Azərbaycanın müdafiə naziri general-polkovnik Zakir Həsənov Minskdə belaruslu həmkarı general-leytenant Viktor Xrenin ilə danışıqlar aparıb. Danışıqlar zamanı tərəflər ikitərəfli hərbi əməkdaşlığın cari vəziyyətini müzakirə edib.
Qarşılıqlı maraq doğuran sahələrdə onun intensivləşdirilməsi yollarını müəyyənləşdiriblər. Belarusun müdafiə naziri öz növbəsində vurğulayıb ki, Azərbaycanla əməkdaşlıq yüksək etimad səviyyəsi ilə fərqlənir: "Belarus və Azərbaycan arasında əməkdaşlıq açıq xarakter daşıyır və yüksək səviyyəli çoxtərəfli dialoq ilə fərqlənir. Bunun ən yaxşı təsdiqi iki ölkənin prezidentləri Aleksandr Lukaşenko və İlham Əliyev arasında dostluq və etimad münasibətləridir. Bir daha hərbi sahədə ikitərəfli münasibətlərimizin yüksək səviyyəsini, ən əsası isə onların daha da dərinləşdirilməsi üçün qarşılıqlı maraq və potensialın mövcudluğunu vurğulamaq istəyirəm". Bəs əməkdaşlığın dərinləşməsi Azərbaycan müdafiə sənayesinə hansı müsbət təsirləri göstərəcək?
Mövzu ilə bağlı hərbi ekspert Ədalət Verdiyev Crossmedia.az-a açıqlama verib:
“Azərbaycan daha əvvəldə Belarus ilə hərbi, hərbi-texniki, hərbi-təhsil sahəsində ciddi əməkdaşlıq edib. Hətta Azərbaycan Belarusun istehsal etdiyi bir çox reaktiv yayılım atəşi sistemlərini, radioelektron mübarizə sistemlərini v.s kimi avadanlıqları silahlanmaya qəbul edib. Bu silahlanmadan biz vətən müharibəsi zamanı kifayət qədər uğurla istifadə etmişik. Ehtimaldır ki, növbəti mərhələdə Azərbaycan ilə Belarus arasında yeni müqavilələrin, hərbi təhlükəsizlik və müdafiə sənayesi sahəsində imzalanmasını da müşahidə edəcəyik”.
Ayhan Ağarzayev
16:20 17.06.2025
Oxunuş sayı: 687
