İranın nüvə ambisiyaları ilə bağlı ABŞ-da fikir ayrılığı: Tramp və kəşfiyyat qarşı-qarşıya
İsrailin İrana endirdiyi zərbələr fonunda ABŞ daxilində də Tehranın nüvə proqramı ilə bağlı ciddi fikir ayrılıqları yaşanır. ABŞ Prezidenti Donald Tramp özünün milli kəşfiyyat direktoru Talsi Qabbardın mövqeyi ilə açıq şəkildə razılaşmayıb.
Crossmedia.az xarici mediaya istinadən bildirir ki, Tramp jurnalistlərlə “Air Force One” təyyarəsində söhbət zamanı İranın nüvə silahı əldə etməyə “çox yaxın” olduğunu bildirib. O, İranın nüvə başlığı hazırlığı ilə bağlı suala qısa və sərt şəkildə “Çox yaxın” cavabını verib.
Jurnalistlər Qabbardın bu ilin martında “İran nüvə silahı hazırlamır” açıqlamasını xatırlatdıqda isə Tramp sərt reaksiya göstərərək deyib: “Məni onun nə dediyi maraqlandırmır. Mən hesab edirəm ki, onlar ona çox yaxın idilər”.
Qeyd edək ki, ABŞ kəşfiyyatının rəsmi mövqeyinə görə, İran hazırda nüvə bombası üzərində işləməsə də, bu silahı əldə etməsi üçün hələ təxminən üç il vaxt tələb olunur. Bu ziddiyyətli yanaşmalar ABŞ administrasiyasında İranla bağlı vahid yanaşmanın formalaşmadığını göstərir.
Zəhra Ağayeva
15:35 17.06.2025
Oxunuş sayı: 8020
