WSJ: İsrail, Rusiya–Ukrayna müharibəsindən İrana qarşı strategiya formalaşdırmaq üçün istifadə edib
İsrailin təhlükəsizlik dairələri Rusiya ilə Ukrayna arasındakı müharibənin gedişini diqqətlə təhlil edərək, bu təcrübədən İrana qarşı mümkün silahlı qarşıdurmada istifadə olunacaq strategiyanı formalaşdırıblar.
Crossmedia.az xarici mediaya istinadən bildirir ki, The Wall Street Journal nəşri İsrailli hərbi ekspertlərin bu analizlər əsasında həm uğurlu, həm də uğursuz nümunələrdən dərs çıxardığını yazır.
Hərbi mütəxəssislərin fikrincə, əsas nəticə budur ki, İsrailin hava qüvvələri ilkin mərhələdə Rusiya ilə müqayisədə daha üstün mövqedədir. Digər tərəfdən, Ukrayna ordusu İranla müqayisədə daha effektiv hava hücumundan müdafiə sistemləri qurmağa müvəffəq olub.
Məqalədə vurğulanır ki, Ukrayna kimi İranın da effektiv döyüş təyyarələri yoxdur. Amma fərq ondadır ki, Kiyev yerüstü hava hücumundan müdafiə sistemlərini formalaşdıra bilib, Tehran isə bu sahədə ciddi zəifliklər göstərib.
Qəfil hücum faktoru da mühüm rol oynayıb. WSJ yazır ki, ABŞ kəşfiyyatının Rusiyanın hücum planları ilə bağlı öncədən verdiyi məlumatlar sayəsində Ukrayna 2022-ci ilin fevralında mobil hava hücumundan müdafiə sistemlərini gizlətməyə və yaymağa nail olub.
İsrailin isə İrana qarşı hücumda gözlənilməzliyi əsas silaha çevirdiyi bildirilir. İddialara görə, İsrail xüsusi təyinatlıları İran ərazisinə sızaraq pilotsuz uçuş aparatları vasitəsilə hava hücumundan müdafiə sistemlərini sıradan çıxarıb. Eyni zamanda, İsrailin İranın hərbi rəhbərliyinin böyük bir hissəsini neytrallaşdırmağa nail olduğu qeyd olunur.
Zəhra Ağayeva
17:05 16.06.2025
Oxunuş sayı: 9436
