Modidən Cənubi Kiprə strateji səfər: Türkiyəyə mesaj verildi
Hindistanın Baş naziri Narendra Modi Cənubi Kiprə rəsmi səfərə gedib. Bu səfər çərçivəsində Hindistanla Cənubi Kipr arasında müxtəlif əməkdaşlıq sənədlərinin imzalanması gözlənilir.
Crossmedia.az xarici mediaya istinadən bildirir ki, Modi bugün Prezident sarayında Cənubi Kipr lideri Nikos Xristodulides tərəfindən rəsmi şəkildə qəbul olunacaq. Rəsmi görüşlərdən öncə isə Modi Larnaka hava limanında qarşılanıb və iş adamları ilə görüşdə iştirak edib.
Bu səfər Modi üçün 2002-ci ildən bəri Cənubi Kiprə ilk baş nazir səfəri olmaqla yanaşı, Pakistanla yaşanan son gərginlikdən sonra Hindistan liderinin ilk beynəlxalq səfəridir. Analitiklər bu səfəri, xüsusilə də Türkiyənin İslamabada verdiyi dəstəyi nəzərə alaraq, Ankaraya dolayısı ilə göndərilmiş siyasi mesaj kimi qiymətləndirirlər.
Hindistanla Cənubi Kipr arasında inkişaf edən əlaqələr fonunda iki ölkə arasında Hind-Avropa münasibətləri və Hindistanın təşəbbüsü ilə irəli sürülən Hindistan-Yaxın Şərq–Avropa İqtisadi Dəhlizi (IMEC) layihəsi də müzakirə mövzularındandır. Qeyd edək ki, Modi bu səfərdən sonra G7 sammitində iştirak etmək üçün Kanadaya, oradan isə Xorvatiyaya yola düşəcək.
Cənubi Kiprin 2026-cı ilin birinci yarısında Avropa İttifaqı Şurasına sədrlik etməyə hazırlaşdığı bir vaxtda Modi hökumətinin Cənubi Kiprlə münasibətləri gücləndirməsi Hindistanın Aİ ilə əməkdaşlığını dərinləşdirmək niyyətini də göstərir.
Zəhra Ağayeva
14:50 16.06.2025
Oxunuş sayı: 8750
