İsrail “Əl-Qüds” qüvvələrinin qərargahlarına aviazərbələr endirib
İsrail Müdafiə Qüvvələri bəyan edib ki, onların Hərbi Hava Qüvvələri Tehranda yerləşən, İranın İnqilab Keşikçiləri Korpusunun (SEPAH) “Əl-Qüds” qüvvələrinə məxsus komanda mərkəzlərinə dəqiq aviazərbələr endirib.
Crossmedia.az xarici mediaya istinadən bildirir ki, ordunun rəsmi nümayəndəsi bu qərargahlarda “Əl-Qüds” qüvvələrinin İsrailə qarşı Yaxın Şərqdəki proksi qüvvələr vasitəsilə terror fəaliyyətlərini koordinasiya etdiyini bildirib.
Hərbi komandanlıq zərbə anlarının videogörüntüsünü də yayımlayıb. Kadrlarda İsrail aviasiyasının İran paytaxtında yerləşən 10 hərbi obyektə — o cümlədən, “Əl-Qüds”lə əlaqəli qərargahlar və infrastruktur obyektlərinə zərbə endirdiyi qeyd olunur.
“Əl-Qüds” qüvvələri 1980-ci illərdə İran-İraq müharibəsi zamanı SEPAH daxilində yaradılmış xüsusi təyinatlı hərbi bölmədir. Onlar İranın xarici siyasətində əsas rol oynayan strukturlardan biri kimi, İraq, Suriya, Livan, Əfqanıstan və Qəzza zolağında müxtəlif silahlı qruplarla — o cümlədən “Hizbullah” və HƏMAS-la — sıx əməkdaşlıq edirlər.
Məlumata görə, İsrailin son hava hücumları nəticəsində SEPAH-ın ali komandanı general Hüseyn Səlami də öldürülüb. Onun yerinə general Əhməd Vahidi təyin edilib.
Bu hücumlar regionda gərginliyin daha da artmasına səbəb olub. Analitiklərə görə, “Əl-Qüds” qüvvələrinin birbaşa hədəf alınması İsrailin İranın xarici təsir imkanlarına qarşı açıq müharibəyə başlamağa qərarlı olduğunu göstərir.
Zəhra Ağayeva
12:30 16.06.2025
Oxunuş sayı: 1029
