“Madleen” gəmisində saxlanılan türk fəal sabah sərbəst buraxılacaq
İsrailin beynəlxalq sularda ələ keçirdiyi və Qəzzaya humanitar yardım aparan “Madleen” yelkənlisində saxlanılan səkkiz fəaldan biri, Türkiyə vətəndaşı Hüseyn Şuayb Ordu sabah günorta saatlarında Almaniyaya göndəriləcək.
Crossmedia.az xəbər verir ki, İsrail hüquq müdafiə təşkilatı “Adalah”ın məlumatına görə, Ramle şəhərindəki Givon miqrasiya həbsxanasında keçirilən məhkəmə fəalların ölkədən çıxarılana qədər saxlanmasına qərar verib. Deportasiya həyata keçirilməsə, fəallar 8 iyulda yenidən məhkəmə qarşısına çıxarılacaqlar.
“Madleen” gəmisində ümumilikdə 12 könüllü saxlanılmışdı. Onlardan dördü artıq ölkələrinə göndərilib. Hazırda həbsdə qalan səkkiz nəfər arasında Avropa Parlamentinin fransalı üzvü Rima Hassan, Almaniya vətəndaşı Yasemin Acar, braziliyalı Thiago Avila, hollandiyalı Marco van Rennes və fransalı Reva Viard, Pascal Maurieras, Yanis Mhamdi də var.
Adalah, fəalların Qəzzaya girməyə cəhd göstərmədiyini, İtaliyanın Kataniya limanından (1 iyun) çıxaraq beynəlxalq sular vasitəsilə birbaşa Qəzza sahillərinə yönəldiklərini, İsrailin müdaxiləsinin isə “beynəlxalq hüquq normalarının pozulması” olduğunu bildirir.
Türkiyə xarici işlər nazirliyinin açıqlamasında, Tel-Əvivdəki səfirliyin Şuayb Ordu və hüquqşünasları ilə daimi əlaqədə olduğu, eləcə də türk əsilli Almaniya vətəndaşı Yasemin Acarın vəziyyətinin diqqətlə izlənildiyi qeyd edilib.
“Freedom Flotilla Coalition” tərəfindən təşkil olunan missiya çərçivəsində 18 metrlik “Madleen” yelkənlisi 9 iyun gecə saatlarında İsrail qüvvələrinin müdaxiləsi ilə saxlanılmış və heyət üzvləri həbs olunmuşdu.
Mədinə Cəlilova
03:00 12.06.2025
Oxunuş sayı: 7721
