ChatGPT ilə hazırlanan hər e-poçt bir şüşə sudan bir qədər artıq sərf edir
OpenAI-nin baş direktoru Sem Altman, ChatGPT-nin orta hesabla bir sorğusunun təxminən “bir çay qaşığının on beşdə biri” qədər su istifadə etdiyini bildirib. Lakin tətbiq üzərindən hazırlanmış sadə bir e-poçtun bir şüşə sudan bir qədər artıq su sərf etdiyi məlum olub.
Crossmedia.az xəbər verir ki, Altman süni intellektin dünyaya təsirindən bəhs etdiyi bloq yazısında, ChatGPT-nin hər sorğusunun orta hesabla 0.000085 qallon (təxminən 0.32 millilitr) su sərf etdiyini açıqlayıb. O, eyni zamanda enerji istifadəsinə də toxunaraq, “Orta bir ChatGPT sorğusu təxminən 0.34 vatt-saat enerji istifadə edir; bu, sobanın bir saniyədən bir qədər artıq işləməsi və ya enerjiyə qənaətcil bir lampanın bir neçə dəqiqədə istifadə etdiyi qədərdir”,- deyib.
Altmana görə, gələcəkdə süni intellektin istifadəsi daha çox elektrik enerjisi xərcləri ilə ölçüləcək.
OpenAI isə bu hesablamaların hansı əsaslarla aparıldığına dair sorğulara hələlik rəsmi cavab verməyib.
Süni intellekt şirkətləri, texnologiyalarının artan su və enerji istehlakı səbəbilə getdikcə daha çox nəzarətə məruz qalır. 2024-cü ildə bəzi tədqiqatçılar, süni intellekt sistemlərinin il sonuna qədər Bitcoin mədənçiliyindən daha çox enerji sərf edə biləcəyini proqnozlaşdırmışdı.
The Washington Post qəzetinin ötən il yayımladığı araşdırmaya əsasən, GPT-4 ilə yaradılmış 100 sözlük bir e-poçtun bir şüşə sudan bir qədər artıq su sərf etdiyi ortaya çıxıb. Həmin hesabatda qeyd olunurdu ki, məlumat mərkəzlərinin yerləşdiyi coğrafi ərazilər su sərfiyyatında əhəmiyyətli rol oynayır.
Mədinə Cəlilova
01:30 12.06.2025
Oxunuş sayı: 9930
