Yunanıstan alovlara büründü: Sakinlər təxliyə edilir
Yunanıstanda üç bölgədə meşə yanğınları baş verib.
Crossmedia.az xəbər verir ki, paytaxt Afina yaxınlığındakı Anavisos bölgəsində alovun sürətlə yayılması səbəbindən Palea Fokea sakinlərindən evlərini tərk etmələri tələb olunub.
Yanğınla mübarizəyə 110 yanğınsöndürən, 28 texnika, habelə havadan 3 təyyarə və 3 helikopter cəlb edilib.
Midilli adasında, Paleokipos bölgəsində baş verən yanğın səbəbindən uşaq bağçası və ibtidai məktəb müvəqqəti olaraq təxliyə edilib.
Qərbi Trakyanın İskeçə vilayətində, Avdıra bölgəsində də meşə yanğınları qeydə alınıb. Hazırda yanğın yaşayış məntəqələrinə təhlükə yaratmasa da, yanğınsöndürmə işləri davam etdirilir.
Yunanıstan mülki müdafiə xidməti 112 xəbərdarlıq sistemi vasitəsilə vətəndaşlara isti hava və güclü külək şəraitində yanğın riskinin yüksək olduğu barədə xəbərdarlıq edib və sakinləri diqqətli olmağa çağırıb.
04:55 11.06.2025
Oxunuş sayı: 1216
