Avropa İttifaqı Rusiyaya qarşı sanksiyaları sərtləşdirir
Avropa İttifaqı Rusiyaya qarşı yeni, daha sərt sanksiyalar paketini tətbiq etməyə hazırlaşır.
Crossmedia.az xəbər verir ki, bu barədə Avropa Komissiyasının rəhbəri Ursula von der Leyen məlumat verib.
Leyen bildirib ki, sanksiyalar paketinə Rusiya neftinin qiymət tavanının 60 dollardan 45 dollara endirilməsi daxildir və bu təklif artıq Q7 ölkələrinə təqdim olunub. Həmçinin, Rusiya xam neft məhsullarının idxalına tam qadağa qoyulacaq.
Sanksiyalar çərçivəsində Rusiyanın “kölgə donanmasına” aid əlavə 77 gəmi də hədəfə alınacaq. Avropa İttifaqı SWIFT sistemi üzərindən əməliyyatları məhdudlaşdıracaq və Rusiya ilə yanaşı digər ölkələrdən olan 22 bankı sanksiyalar siyahısına əlavə edəcək.
Avropa Komissiyasının rəhbəri, həmçinin, “Şimal Axını-1” və “Şimal Axını-2” qaz kəmərlərinə sanksiya tətbiq edilməsinin təklif olunduğunu bildirib.
Bu tədbirlərin məqsədi Rusiyanın iqtisadi resurslarını məhdudlaşdırmaq və Ukraynaya qarşı hərbi təcavüzün dayandırılması üçün təzyiqi artırmaqdır.
20:04 10.06.2025
Oxunuş sayı: 8115
