Rusiya Ukraynaya cəhənnəm gecəsi yaşatdı - Kiyev alov içində, Odesada ölənlər var
Rusiya ötən gecə Ukraynaya genişmiqyaslı dron və raket hücumu təşkil edib. Kiyev şəhərində paytaxtın on rayonundan yeddisində ciddi dağıntılar baş verib, dörd nəfər xəsarət alıb. Bu, şəhərə edilən ən böyük hücumlardan biri kimi qiymətləndirilir.
Crossmedia.az xəbər verir ki, bu barədə BBC məlumat verib.
Ukrayna Prezidenti Volodimir Zelenski bildirib ki, Rusiya ölkə üzrə ümumilikdə 315 dron buraxıb. Hücumlar zamanı iki Şimali Koreya istehsalı ballistik raketin də istifadə edildiyi iddia edilir.
Cənubdakı Odesa şəhərində isə dron zərbələri nəticəsində iki nəfər həlak olub, on üç nəfər yaralanıb. Hücum zamanı yaşayış binaları, doğum evi və digər tibbi müəssisələr hədəfə alınıb. Rəsmilər evakuasiyanın vaxtında həyata keçirildiyini, lakin təcili yardım maşınlarının zərər gördüyünü bildiriblər.
Kiyev meri Vitali Kliçko və şəhər hərbi administrasiyasının rəhbəri Timur Tkaçenko hücumların eyni vaxtda müxtəlif rayonlara yönəldiyini, bir neçə binaya dron qalıqlarının düşdüyünü və yanğınların baş verdiyini açıqlayıblar. Tkaçenko gecəni “çətin və qorxulu” adlandırıb.
Zelenski bildirib ki, bu hücumlar Rusiya ilə Ukrayna arasında davam edən gərginliyin bir hissəsidir və “atəşkəs əvəzinə növbəti gecə də terror hücumları” ilə yadda qalıb.
Ukrayna da cavab olaraq Rusiyanın hava bazalarına “Operation Spider’s Şeb” adlı dron hücumu həyata keçirib. Bu səbəbdən bir neçə Rusiya hava limanı müvəqqəti bağlanıb.
Hücumlar zamanı Ukraynada geniş ərazilərdə hava həyəcanı elan olunub, o cümlədən Kiyev, Donetsk, Luqansk və Xarkov bölgələrində.
Hadisələr fonunda Ukrayna və Rusiya arasında ağır yaralı və xəstə əsirlərin, 25 yaşdan kiçik hərbçilərin və 12,000 əsgər cəsədinin mübadiləsinə başlanılıb. Zelenski bu prosesi “çox mərhələli və həssas detallarla dolu” kimi xarakterizə edib.
Nigar Rəhimova
15:01 10.06.2025
Oxunuş sayı: 7543
