Alman nazirdən Qəzza etirazı: “Əliniz qana batıb”
Almaniyanın xarici işlər naziri Yoxann Vadeful Bundestaqda Fələstin tərəfdarları tərəfindən etirazla qarşılanıb. Xristian Demokrat Birlik (CDU) partiyasının üzvü olan Vadeful və İqtisadi Əməkdaşlıq və İnkişaf naziri Reem Alabali-Radovan, parlament sədri Yuliya Klöknerin rəhbərliyi ilə deputatların suallarını cavablandırarkən insident baş verib.
Crossmedia.az xarici mətbuata istinadən xəbər verir ki, Qəzzadakı vəziyyətlə bağlı suala cavab verən Vadefulun çıxışı zamanı tamaşaçı tribunasında olan bir qadın “Əliniz qana batıb” və “Fələstinə azadlıq” şüarları səsləndirib. Təhlükəsizlik əməkdaşları etirazçını zorla zaldan çıxarıb.
Eyni zamanda Sol Partiyanın millət vəkili Cansın Köktürk də üzərində “Fələstin” yazılmış köynək geyindiyi üçün Yuliya Klöknerin göstərişi ilə ümumi iclas zalını tərk etməyə məcbur edilib. Köktürk sosial şəbəkə platforması X-dəki paylaşımında, “Vadeful: Almaniya İsrailə silah göndərməyə davam edəcək. 50 mindən çox ölü və yaralı uşaqdan isə bir kəlmə belə yoxdur. Klökner isə zalı tərk etməyimi istədi, çünki köynəyimdə ‘Fələstin’ yazılmışdı. Hamınız biabırçı şəkildə uğursuz oldunuz” ifadələrini işlədib.
Mədinə Cəlilova
02:00 05.06.2025
Oxunuş sayı: 7907
