Dünya əhalisi yanlış hesablanıb: “Bir neçə milyard artıq insan yaşayır”
Yeni bir araşdırmaya görə, kənd ərazilərində yaşayan insanların sayı ən azı 50 faiz az hesablanıb. Bu isə Yer kürəsində real əhali sayının rəsmi rəqəmlərdən xeyli çox ola biləcəyini göstərir.
Crossmedia.az xəbər verir ki, Birləşmiş Millətlər Təşkilatı ötən ilin yayına əsasən dünya əhalisinin təxminən 8,2 milyard olduğunu bildirmişdi. Lakin Finlandiyanın Aalto Universitetindən tədqiqatçı Yosias Láng-Ritter və həmkarlarının apardığı araşdırma, rəsmi məlumatlarda ciddi çatışmazlıqlar olduğunu ortaya çıxarıb.
Tədqiqatçılar qeyd edib ki, kənd yerlərindəki məlumat bazaları çox vaxt natamam olur və təhlil edilən müxtəlif verilənlər bazaları arasında ciddi uyğunsuzluqlar müşahidə edilib. Bu da o deməkdir ki, kənd əhalisinin sayı ən dəqiq mənbələrdə belə olduğundan iki dəfə az göstərilib.
Nüfuzlu “Nature”elmi jurnalında dərc edilən məqalədə BMT-nin kənd ərazilərində yaşayan insanların sayını ən az 50 faiz az hesabladığı təsbit olunub. Bu isə yer üzündə düşünüləndən yüz milyonlarla, hətta bir neçə milyard artıq insanın yaşadığı anlamına gəlir.
Məsələnin təhlilinə qoşulan London Queen Mary Universitetindən professor Conatan Kennedinin fikrincə, bu nəticələr planetin məhdud resursları baxımından narahatedici görünsə də, mütləq pis bir xəbər deyil. O, “aşırı əhali” ilə bağlı qorxuların çox zaman şişirdildiyini bildirib.
BMT-nin proqnozlarına əsasən, dünya əhalisi 2080-ci illərin ortalarında zirvəyə çatacaq və daha sonra azalmağa başlayacaq. Bu isə bir çox mütəxəssisi əhali azalmasının doğura biləcəyi təhlükələri düşünməyə vadar edir.
Professor Kennediyə görə, bu qədər insan Yer resurslarına ciddi yük yaratsa da, əgər istehlak düzgün idarə olunarsa və davamlı texnologiyalar inkişaf etdirilərsə, qlobal fəlakətlərin qarşısını almaq mümkündür.
Mədinə Cəlilova
03:00 05.06.2025
Oxunuş sayı: 5989
