Kölndə 20 min nəfər təxliyə edildi: İkinci Dünya Müharibəsindən qalan 3 bomba zərərsizləşdiriləcək
Almaniyanın Köln şəhərində İkinci Dünya Müharibəsindən qalan və partlamamış üç bombanın zərərsizləşdirilməsi məqsədilə 20 min 500 nəfər təxliyə olunub.
Crossmedia.az Almaniya mətbuatına istinadən xəbər verir ki, bombalar bazar ertəsi günü şəhərin Deutz bölgəsində yerləşən bir tersanədə aşkarlanıb. Mütəxəssislər partlamamış Amerikan istehsalı bombaların yaratdığı təhlükə səbəbindən 1 kilometrlik ərazidə genişmiqyaslı əməliyyat başladıb.
Təxliyəyə yaşayış binaları, otellər, məktəblər, böyük bir xəstəxana və əsas dəmiryolu stansiyası da daxil edilib. Eduardus xəstəxanasında yerləşən bəzi reanimasiya xəstələri təcili yardım maşınları ilə çıxarılıb. Bomba zərərsizləşdirmə əməliyyatı yalnız ərazidə yaşayan bütün şəxslərin təhlükəsiz şəkildə təxliyəsindən sonra başlayacaq. Bombalardan biri 10 ton, digər ikisi isə 20 ton ağırlığındadır.
Almaniya rəsmiləri BBC-yə bildiriblər ki, evlərini tərk etməkdən imtina edən şəxslər polis müşayiəti ilə zorla çıxarılacaq və yüksək məbləğdə cərimələr tətbiq oluna bilər. Köln İctimai Nizam İdarəsinin rəhbəri Ralf Mayer qeyd edib ki, şəhər mərkəzi Avropanın ən sıx əhalisi olan bölgələrindən biridir.
Təxliyə zamanı köçəcək yeri olmayan insanlar üçün iki müvəqqəti mərkəz yaradılıb. Əhaliyə sakit qalmaq, şəxsiyyət vəsiqələrini və dərmanlarını özləri ilə götürmək, ev heyvanlarına xüsusi diqqət yetirmək tövsiyə edilib. Şəhərdəki muzeylər, mədəniyyət mərkəzləri, dövlət binaları, 58 otel və doqquz məktəb müvəqqəti olaraq bağlanıb.
Ərazidəki yolların bağlanması səbəbilə şəhər nəqliyyatında ciddi axsamalar yaşanır. Messe Deutz stansiyasından bir çox qatar reysi yerli vaxtla səhər saat 08:00-dan etibarən ləğv edilib. Köln Bonn Hava Limanında uçuşlar davam etsə də, hava limanına qatar və avtomobil ilə çatımın çətinləşəcəyi gözlənilir.
Mədinə Cəlilova
22:40 04.06.2025
Oxunuş sayı: 1003
