İstanbul danışıqlarından sonra gərginlik artır: Liderlərdən sərt mesajlar
Ukrayna Prezidenti Volodimir Zelenski, Rusiyanın İstanbulda təqdim etdiyi memorandumun əslində bir ultimatum xarakteri daşıdığını bildirib. Rusiya Prezidenti Vladimir Putin isə son hücumları nəzərə alaraq Ukrayna ilə zirvə və atəşkəs ehtimalına şübhə ilə yanaşdığını deyib.
Crossmedia.az xəbər verir ki, 2 iyun tarixində İstanbulda keçirilən Rusiya-Ukrayna ikinci birbaşa danışıqlar turundan sonra Zelenski jurnalistlərə açıqlamalar verib. O, Rusiya ilə liderlər səviyyəsində görüş baş tutana qədər atəşkəs təklif etdiklərini bildirərək, “Tərəfdaşlarımızın da dəstəkləyəcəyinə inanıram: liderlər görüşənə qədər ruslara atəşkəs təklif etmək istəyirik”, - deyib.
Kiyevdə keçirilən mətbuat konfransında danışan Zelenski, “Qərar qəbul olunmayan səviyyədə İstanbul danışıqlarını davam etdirmək mənasızdır,” deyə vurğulayıb. O, İstanbulda əldə olunan ikinci əsir mübadiləsi razılaşmasının həftəsonu reallaşa biləcəyini də açıqlayıb.
Zelenski, Rusiyanın təqdim etdiyi sənədin bir razılaşma mətni deyil, açıq şəkildə ultimatum olduğunu bildirib: “Bu bir razılaşma sənədi deyil. Razılaşma ən azı iki tərəf tərəfindən imzalanmalıdır. Tək tərəfin tələb etdiyi bir sənədə razılaşma deyil, ultimatum deyilir”.
Ukrayna Prezidenti əlavə edib ki, Rusiya bu danışıqları yalnız keçmiş ABŞ Prezidenti Donald Trampı razı salmaq və ABŞ sanksiyalarını təxirə salmaq üçün apardığını düşünür. Zelenski həm Putin, həm Tramp, həm də Prezident Rəcəb Tayyib Ərdoğanla görüşməyə hazır olduğunu qeyd edib.
Putin isə İstanbul danışıqları öncəsi Rusiyaya qarşı həyata keçirilən “Tor Şəbəkəsi” adlı hücumu xatırladaraq, bombardman təyyarələrinə vurulan milyardlarla dollar ziyanın atəşkəs və zirvə şansını azaltdığını deyib. O, “Son hücumları nəzərə alaraq Ukrayna ilə zirvə və atəşkəs ehtimalından şübhələnirəm”,- deyib.
Putin Kiyev rəhbərliyinin atəşkəs dövrlərindən silahlanmaq və yeni hücumlar planlaşdırmaq üçün istifadə etdiyini bildirərək, “Niyə onlara vaxt qazandıraq? Bu müddət rejimin Qərbdən silah alması, məcburi səfərbərlik aparması və terror aktları hazırlaması üçün istifadə olunacaq”,-deyə bəyan edib.
Rusiyanın xarici işlər nazirinin müavini Sergey Ryabkov da bu hücumlara cavab olaraq “bütün variantların masada olduğunu” bildirib. Ryabkov, cavab tədbirlərinin Rusiya müdafiə nazirliyi tərəfindən müəyyənləşdiriləcəyini açıqlayıb.
Rusiya nümayəndə heyətinin rəhbəri Vladimir Medinski və xarici işlər naziri Sergey Lavrov da İstanbul zirvəsinə dair fikirlərini bölüşüblər. Medinski, Ukraynanın 30-60 günlük qeyd-şərtsiz atəşkəs təklif etdiyini, 7-9 iyun tarixlərində əsir mübadiləsinə hazır olduqlarını bildirib. O, 200 ukraynalı və 200 rus əsgərinin qarşılıqlı azad ediləcəyini, 6 min ukraynalı hərbçinin cəsədinin də təhvil veriləcəyini deyib. Medinski həmçinin 339 itkin uşaqla bağlı siyahı olduğunu və onların Ukraynaya qaytarılması üçün işlərin davam etdiyini qeyd edib.
Sergey Lavrov isə İstanbulda baş tutan iki tur birbaşa görüşün nəticə verdiyini, real irəliləyiş olduğunu bildirib. O, Ukraynanın, həlak olmuş hərbçilərinin cəsədlərinin geri alınması üçün 2-3 günlük atəşkəs təklifini rədd etdiyini də vurğulayıb.
Mədinə Cəlilova
22:20 04.06.2025
Oxunuş sayı: 8366
