Azərbaycan və Keniya strateji əməkdaşlığı genişlədirir - YENİLƏNİB
Azərbaycan Respublikasının xarici işlər naziri Ceyhun Bayramov Keniya Respublikasına rəsmi səfəri çərçivəsində bu ölkənin Baş naziri, xarici işlər və diaspor naziri Musalia Mudavadi ilə görüşüb.
Crossmedia.az Azərbaycanın Xarici İşlər Nazirliyinə istinadən xəbər verir ki, tərəflər arasında baş tutan təkbətək görüş daha sonra hər iki tərəfdən nümayəndə heyətlərinin iştirakı ilə geniş tərkibdə davam etdirilib.
Geniş tərkibli görüş zamanı Azərbaycan-Keniya ikitərəfli və çoxtərəfli əməkdaşlıq gündəliyində yer alan aktual məsələlər müzakirə edilib.
Diplomatik münasibətlərin 20 illiyinin qeyd olunduğu Azərbaycan-Keniya münasibətlərinin qarşılıqlı faydalı əməkdaşlığa əsaslandığına dair həmfikirlik ifadə olunub, ali və yüksək səviyyəli səfərlərin dinamikasının saxlanılması, Xarici İşlər Nazirlikləri arasında siyasi məsləhətləşmələrin müntəzəmliyinin təmini və ikitərəfli hüquq-müqavilə bazasının güncləndirilməsinin əhəmiyyəti vurğulanıb.
Azərbaycan ilə Keniya arasında BMT, Qoşulmama Hərəkatı və BMT-nin İqlim Dəyişikliyi Konfransı (COP29) kimi çoxtərəfli platformalar çərçivəsində qarşılıqlı etimad və dəstəyə əsaslanan əməkdaşlığın məmnunluq doğurduğu diqqətə çatdırılıb.
İqtisadiyyat, ticarət, investisiyalar və ətraf mühit ölçülərinə toxunularaq, informasiya və kommunikasiya texnologiyaları, enerji və təbii ehtiyatlar, kənd təsərrüfatı və turizm, iqlim dəyişikliyinə qarşı mübarizə və yaşıl transformasiya sahələrində əməkdaşlıq üçün böyük potensial və imkanların olduğu bildirilib.
Dövlət xidmətlərinin əlçatanlığının təmini və asanlaşlaşdırılması sahəsində Azərbaycanın unikal layihəsi olan “Asan Xidmət” ilə Keniyanın “Huduma Proqramı” arasında intensivləşən əməkdaşlıqdan məmnunluq ifadə olunub.
Azərbaycan və Keniya arasında təhsil və mədəniyyət sahələri üzrə mübadilələrin artırılmasının xalqlarımızın bir-birini daha yaxından tanıması və anlamasındakı rolundan bəhs olunub.
Azərbaycan Respublikasının Keniyanın paytaxtı Nayrobi şəhərində Səfirliyinin rəsmi fəaliyyətə başlamasının ikitərəfli əməkdaşlığımızın daha sistematik və əhatəli şəkildə həyata keçirilməsinə töhfə verəcəyinə dair əminlik ifadə olunub.
Görüş zamanı tərəflər, həmçinin qarşılıqlı maraq doğuran digər regional və beynəlxalq məsələləri müzakirə ediblər.
12:04
XXX
Azərbaycan xarici işlər naziri Ceyhun Bayramov Keniyanın Baş naziri, eyni zamanda xarici və diaspora işləri naziri Musalia Mudavadi arasında görüş keçirilir.
Crossmedia.az xəbər verir ki, bu barədə Azərbaycan XİN "X" hesabında məlumat yayıb.
Qeyd edilib ki, tərəflər iki ölkə arasında qarşılıqlı maraq doğuran geniş spektrli ikitərəfli və çoxtərəfli məsələlər üzrə fikir mübadiləsi aparmaq üçün təkbətək görüşür.
21:22 03.06.2025
Oxunuş sayı: 1706
