Ali təhsil proqramlarının yenilənməsi strateji əhəmiyyət daşıyır - EKSPERT
Elm və Təhsil Nazirliyində yeni ali təhsil proqramlarının hazırlanması məqsədilə yaradılmış Komissiyanın növbəti iclası keçirilib. İclasda magistratura səviyyəsində təhsilin məzmununun təkmilləşdirilməsi və yeni ixtisaslaşmaların siyahısı müzakirə olunub. Sonda təqdim olunan sənədlər səsvermə yolu ilə təsdiqlənib və iclas müzakirə formatında davam etdirilib.
Mövzu ilə bağlı təhsil eksperti Rizvan Fikrətoğlu Crossmedia.az-a verdiyi açıqlamada bildirib ki, ölkəmizdə yeni ali təhsil proqramlarının hazırlanmasına ciddi ehtiyac var. Onun sözlərinə görə, Elm və Təhsil Nazirliyinin bu istiqamətdə gördüyü işlər mühüm əhəmiyyət daşıyır.
R.Fikrətoğlunun sözlərinə görə, yeni proqramların hazırlanması zərurəti həm qlobal, həm də yerli inkişaf meyilləri ilə bağlıdır. Ekspertin fikrincə, əmək bazarının tələblərinin dəyişməsi, texnologiyanın sürətli inkişafı, tələbələrin gözləntiləri və fərdiləşmiş təhsil modeli bu ehtiyacı ortaya çıxarır: “Qlobal rəqabətlilik, beynəlxalq standartlara uyğunlaşma, milli inkişaf strategiyası, tədris metodologiyasının yenilənməsi – bütün bunlar yeni təhsil proqramlarına ehtiyacın əsas səbəbləridir”.
Ekspert vurğulayıb ki, bu gün süni intellekt, data analitikası, yaşıl enerji kimi yeni peşələr və sahələr meydana çıxır. “Mövcud ixtisasların daxilində belə, bacarıqlara dair tələblər dəyişir. Məsələn, əvvəl kitabxanaçılıq ənənəvi şəkildə təqdim olunurdusa, bu gün artıq elektron kitabxanaçılıq ön plana çıxır. Ənənəvi medianı isə sosial media və yeni media əvəz edir. Bu səbəbdən işəgötürənlər çevik və praktik bacarıqlara malik məzunlara üstünlük verirlər”– deyə o qeyd edib.
Rizvan Fikrətoğlu əlavə edib ki, rəqəmsallaşma, avtomatlaşdırma və texnoloji innovasiyalar da təhsil məzmununun yenilənməsini zəruri edir: “Süni intellektin təhsilə inteqrasiyası qaçılmazdır. Gənclər çevik, maraqlı və praktik yönümlü proqramlara üstünlük verirlər. Tədrisin fərdiləşməsi və onlayn formatların artması da yeni proqramları tələb edir. Bu baxımdan distant təhsillə bağlı yeni dövlət standartının qəbul olunması da əhəmiyyətlidir”.
Ekspert qeyd edib ki, hökumətin sosial-iqtisadi və elmi inkişaf planları yeni sahələr üçün ixtisaslı kadr hazırlığını önə çəkir. Və o hesab edir ki, yerli problemlərin – rəqəmsal savadlılıq, ətraf mühit, regional inkişaf və sairə – həlli üçün də yeni yanaşmalar lazımdır. Bu isə fərqli və daha innovativ təhsil proqramlarını zəruri edir.
Təhsildə tənqidi düşüncə, problem həll etmə, komanda işi kimi bacarıqların ön plana keçdiyini deyən Rizvan Fikrətoğlu bildirib ki, artıq ənənəvi dərs metodları kifayət etmir. Aktiv öyrənmə, layihə əsaslı və təcrübəyə söykənən metodlar daha səmərəli hesab olunur.
Ekspert magistratura səviyyəsinə də xüsusi diqqət ayırıb. Onun sözlərinə görə, ölkənin dayanıqlı inkişafı üçün yüksək ixtisaslı kadr potensialının formalaşdırılması strateji əhəmiyyət daşıyır. Rizvan Fikrətoğlu, bu baxımdan magistratura pilləsində mütəxəssis hazırlığının keyfiyyəti artırılmalı olmasının vacibliyini də vurğulayıb . Bu proses ölkənin sosial-iqtisadi inkişaf prioritetlərinə uyğun aparılmalıdır. Magistr təhsili daha analitik düşüncə və tədqiqat yönümlü yanaşmanı əhatə etməlidir.
Rizvan Fikrətoğlu əlavə edib ki, sosial-iqtisadi və texnoloji dəyişikliklər yeni bacarıqlara malik mütəxəssislərə ehtiyacı artırır. O hesab edir ki, magistr pilləsində təhsil alanlar sahəvi dərin biliklərə malik olmalı, əmək bazarına adaptasiya oluna bilməlidir. Bu səviyyədə strateji və tənqidi düşüncə bacarıqları formalaşmalı, elmi tədqiqat bacarıqları və problem həll etmə qabiliyyətləri ön plana çəkilməlidir.
Ekspert qeyd edib ki, Elm və Təhsil Nazirliyi bu istiqamətdə mühüm addımlar atır və yeni proqramlar üzərində işlər davam etdirilir.
Fatimə Nəbiyeva
12:47 27.05.2025
Oxunuş sayı: 1401
