ADPU ilə Qazi Universiteti arasında əməkdaşlıq perspektivləri müzakirə edilib
Azərbaycan Dövlət Pedaqoji Universitetinin (ADPU) rektoru professor Cəfər Cəfərov, beynəlxalq əlaqələr üzrə prorektor professor Mahirə Hüseynova, Beynəlxalq əlaqələr şöbəsinin müdiri Günay Məhərrəmova, Filologiya fakültəsinin dekanı dosent Könül Həsənova və Müasir Azərbaycan dili kafedrasının müdiri dosent Könül Səmədova Türkiyəyə səfərləri çərçivəsində Qazi Universitetində olublar.
Crossmedia.az ADPU-ya istinadən xəbər verir ki, Qazi Universitetinin rektoru professor Uğur Ünal ilə keçirilən görüşdə əməkdaşlığın mövcud vəziyyəti və perspektivləri, tələbə və müəllim mübadiləsi, təhsil proqramlarının inkişafı və elmi-tədqiqat sahəsində birgə layihələrin həyata keçirilməsi məsələləri müzakirə olunub.
Səfərin ikinci hissəsində Filologiya fakültəsinin dekanı dosent Könül Həsənova və Beynəlxalq əlaqələr şöbəsinin müdiri Günay Məhərrəmova Qazi Universitetinin Təhsil fakültəsinin dekanı professor Bilal Günəş ilə görüşüblər. Tərəflər fakültələrarası əməkdaşlıq imkanlarını dəyərləndiriblər. Daha sonra ADPU nümayəndələri fakültənin fəaliyyəti ilə yaxından tanış olub, Qazi Universitetinin nəzdində fəaliyyət göstərən Azərbaycan Mədəniyyət Mərkəzində Azərbaycan dili dərsində iştirak ediblər.
12:50 08.05.2025
Oxunuş sayı: 643
