Trampdan Ərdoğana zəngdən sonra mesaj: “Türkiyə ilə dərhal əməkdaşlığa başlayırıq”
ABŞ-ın hazırkı prezidenti Donald Tramp, Türkiyə Prezidenti Rəcəb Tayyib Ərdoğanla telefon danışığından dərhal sonra öz sosial şəbəkəsində “DƏRHAL” sözünü böyük hərflərlə qeyd edərək Ankara ilə əməkdaşlığa başlamaq niyyətində olduğunu açıqladı.
Crossmedia.az xarici mediaya istinadən xəbər verir ki, türkiyəli analitiklərin fikrincə, Vaşinqtonla Ankara arasında belə “dərhal” strateji əməkdaşlığın başlanması PKK-nın mövqelərini ciddi şəkildə zəiflədə bilər. Əsasən də təşkilatın xarici müdafiəyə ümidləri sarsıla bilər. Beynəlxalq himayədarlara arxalanmaq imkanının itirilməsi, PKK üçün özünü buraxmaq (öz-özünü ləğv etmək) qərarının qəbulu zamanı həlledici faktor ola bilər.
Lakin Ərdoğan bütün strategiyanı yalnız Dövlət Baxçalı tərəfindən irəli sürülmüş PKK-nın sülh yolu ilə silahsızlaşdırılması təşəbbüsünə bağlamır. Xatırladaq ki, bu təşəbbüsü dövlət siyasətinin bir hissəsinə çevirən prezident çıxışlarından birində vurğulamışdı: Baxçalı “yalnız əlini deyil, bütün siyasi karyerasını da riskə atıb”.
Beləliklə, Türkiyə rəhbərliyi təkcə PKK-nın özünü buraxmasını sürətləndirmək deyil, eyni zamanda Yaxın Şərqdə uzun müddətdir dalana dirənmiş bir sıra digər prosesləri də canlandırmaq istəyir. Trampın yaxın tərəfdarlarından birinin ABŞ-ın Ankaradakı səfiri təyin edilməsi bu prosesləri sürətləndirəcəkmi – bu sual hələ də açıq qalır.
09:35 08.05.2025
Oxunuş sayı: 7225
