Ermənistan Konstitusiyasını dəyişir: Bakı ilə gərginlik azalacaqmı?
Ermənistanın ədliyyə naziri Srbui Qalayanın sözlərinə görə, ölkənin yeni Konstitusiyasının mətni 10 aya hazır olacaq.
Crossmedia.az xəbər verir ki, bu barədə “TACC” məlumat yayıb.
Nazir bildirib ki, sənəd hazırda işlənmə mərhələsindədir və müxtəlif mətn variantları müzakirə olunur. Lakin hələlik yekun qərar qəbul edilməyib.
Eyni zamanda Qalayan vurğulayıb ki, baş nazir Nikol Paşinyanın bəyanatına baxmayaraq, Konstitusiyadan Müstəqillik Bəyannaməsinə istinadın çıxarılması məsələsi rəsmi şəkildə müzakirə olunmayıb.
Xatırladaq ki, mart ayının sonunda Paşinyan 2027-ci ildə yeni Konstitusiyanın qəbul olunması ilə bağlı referendum keçirilməsinin planlaşdırıldığını açıqlamışdı. Onun sözlərinə görə, bu referendum 2026-cı ildəki parlament seçkiləri ilə eyni vaxtda da keçirilə bilər. Paşinyan həmin vaxt bildirmişdi ki, Konstitusiyanın dəyişdirilməsi daxili siyasi məsələdir, lakin bunun “regional və beynəlxalq təsirləri” də istisna edilə bilməz.
Aprel ayında isə baş nazir parlamentdə çıxışı zamanı yeni Konstitusiyada Müstəqillik Bəyannaməsinə istinadın yer almamalı olduğunu bəyan etmişdi.
Qeyd edək ki, Bakı Ermənistan Konstitusiyasında Azərbaycana qarşı ərazi iddialarını ehtiva edən müddəaların çıxarılmasını tələb edir.
Nigar Rəhimova
17:27 07.05.2025
Oxunuş sayı: 848
