Azərbaycan və Almaniya bərpa olunan enerji sahəsində əməkdaşlığı gücləndirir
Bu ilin may ayının ikinci yarısında Bakıda Azərbaycan və Almaniya nümayəndələrinin bərpa olunan enerji mənbələrinə (BOEM) keçid çərçivəsində əməkdaşlıq məsələlərinə həsr olunmuş görüşü keçiriləcək.
Bu barədə Crossmedia.az Alman-Azərbaycan Ticarət Palatasına(“AHK Azerbaijan”) istinadən xəbər verir.
Qarşıdakı danışıqlar Azərbaycanın iqtisadiyyat naziri Mikayıl Cabbarov ilə Almaniyanın aparıcı enerji şirkətlərinin nümayəndələri arasında daha əvvəl keçirilmiş görüşlərin davamı olacaq.
Palatadan bildirilib ki, dialoqun mərkəzində texnoloji əməkdaşlıq, milli strategiyaların həyata keçirilməsinə dəstək, BOEM sahəsində birgə layihələrin işə salınması, həmçinin dayanıqlı enerji texnologiyalarının yerli səviyyədə uyğunlaşdırılması qalır.
"Enerji keçidi ilə bağlı mövzular Almaniya-Azərbaycan dialoqunda əsas yer tutmağa davam edir. Bununla yanaşı, "yaşıl" və dayanıqlı enerji sahəsində əməkdaşlıq perspektivlərinin müzakirəsi, uğurlu layihələrin təqdimatı, həmçinin iki ölkənin maraqlı tərəfləri arasında qabaqcıl təcrübə mübadiləsi gözlənilir", - “AHK Azerbaijan”dan qeyd ediblər.
Daha əvvəl palatanın icraçı direktoru Narqis Vik vurğulayıb ki, Almaniya Azərbaycanda BOEM üzrə innovativ mərkəzin yaradılmasına əhəmiyyətli töhfə verə bilər.
Azərbaycanın planlarına uyğun olaraq, 2027-ci ilə qədər ölkədə ümumi gücü təxminən 2 QVt olan 8 sənaye miqyaslı günəş və külək elektrik stansiyası tikiləcək. Layihələrə ümumi investisiya qoyuluşu 2,8 milyard ABŞ dolları məbləğində qiymətləndirilir və xarici və yerli sərmayələr hesabına maliyyələşdiriləcək.
Bu planların həyata keçirilməsi ildə 5,3 milyard kVt/saat "yaşıl enerji" istehsal etməyə, enerji sistemində BOEM-in payını 32,6 %-ə çatdırmağa, ildə 1,2 milyard kubmetr qaza qənaət etməyə və istixana qazı emissiyalarını 2,5 milyon ton azaltmağa imkan verəcək.
Azərbaycan 2030-cu ilədək bərpa olunan enerji mənbələrindən 7 QVt enerji istehsal etməyi planlaşdırır ki, bunun da 5 QVt-ı ixrac olunacaq.
17:57 02.05.2025
Oxunuş sayı: 867
