Miçiqan Dövlət və İstanbul Boğaziçi universitetlərinin alimləri BDU-da ustad dərsi keçiblər
Bakı Dövlət Universitetinin (BDU) Sosial elmlər və psixologiya fakültəsinin Fəlsəfə kafedrasının təşəbbüsü ilə Miçiqan Dövlət Universitetinin professoru Duqlas K. Hartman, İstanbul Boğaziçi Universitetinin Təhsil fakültəsinin dekanı doktor Dilək Altun tələbələrə “Universitet müəllimlərinə səlahiyyət verən süni intellektlə təkmilləşdirilmiş peşəkar inkişafın layihələndirilməsi” mövzusunda ustad dərsi keçiblər.
Crossmedia.az xəbər verir ki, bu barədə BDU-dan məlumat verilib.
Professor Duqlas K. Hartman çıxışında süni intellekt texnologiyalarının təhsil sahəsində tətbiqinin müasir dövrdə əsaslı dəyişikliklərə səbəb olduğunu vurğulayıb. O bildirib ki, bu texnologiyalar təhsilin keyfiyyətini artırmaq və təlim prosesini inkişaf etdirmək üçün geniş imkanlar yaradır. Miçiqan Dövlət Universitetində tələbələrin dərs prosesində ChatGPT və digər süni intellekt proqramlarından istifadə etdiklərini qeyd edən professor tələbələrin bu vasitələrlə qarşılıqlı əlaqədə olarkən əldə etdikləri nəticələri qiymətləndirdiklərini bildirib. Süni intellektin, xüsusilə də ChatGPT və digər modellərin tələbələrin müzakirələrini faktların dəqiqliyi, mövzunun dərindən mənimsənilməsi, terminologiyanın düzgün istifadəsi, dinləmə bacarıqları və konstruktiv mübahisə kimi əsas parametrlər üzrə qiymətləndirməyə imkan verdiyini əlavə edib.
Dilək Altun isə çıxışında süni intellektin məktəbəqədər və məktəbyaşlı uşaqlarda yaratdığı müsbət və mənfi təsirlərdən danışıb. O, bəzi oyun proqramlarının uşaqlarda müsbət cəhətlər formalaşdırdığını qeyd edərək, oyunların seçimində yaş həddinin nəzərə alınmasının vacibliyini vurğulayıb. Dilək Altun, həmçinin kiçik yaşlı uşaqlarda elektron və səsli kitablara marağın artdığını, bu səbəbdən valideynlərin kitab janrlarını düzgün seçməsinin əhəmiyyətli olduğunu diqqətə çatdırıb.
Mühazirəçilər süni intellektin təhsil sisteminə tətbiqinin tədris prosesini əsaslı şəkildə dəyişdirdiyini vurğulayıblar. Bu dəyişikliklərə uyğunlaşmaq və təhsil sistemini inkişaf etdirmək üçün təhsil siyasətlərinin yenidən nəzərdən keçirilməsi və müəllimlərin peşəkar inkişafının önəmi qeyd olunub. Süni intellektin düzgün tətbiqi təhsildə daha effektiv, əhatəli və maraqlı imkanların yaranmasına səbəb ola bilər.
19:29 01.05.2025
Oxunuş sayı: 10848
