Ukrayna ilə ABŞ arasında nadir torpaqlar üzrə saziş 24 saat ərzində imzalana bilər
Ukraynanın Baş naziri Denis Şmıqal ölkəsi ilə ABŞ arasında nadir torpaq elementlərinə dair sazişin 24 saat ərzində imzalanmasının mümkün olduğunu bildirib.
Crossmedia.az xəbər verir ki, Baş nazir bu barədə yerli mətbuata açıqlamasında danışıb.
Onun sözlərinə görə, hazırda tərəflər sənədin yekun detallarını müzakirə edir.
“Amerikalı həmkarlarımızla birlikdə sazişin son detallarını artıq tamamlayırıq. Bütün məqamlar razılaşdırıldıqdan sonra, ümid edirik ki, 24 saat ərzində müqavilə imzalanacaq və ilk addımı atacağıq”, – deyə Şmıqal qeyd edib.
O, həmçinin Ukrayna Baş nazirinin müavini, iqtisadiyyat naziri Yuliya Sviridenkonun bu məsələ ilə bağlı danışıqları davam etdirmək üçün ABŞ-da olduğunu bildirib.
Qeyd edək ki, nadir torpaq elementləri yüksək texnologiyalar, hərbi sənaye və enerji sektorları üçün strateji əhəmiyyətə malikdir. Bu baxımdan ABŞ və Ukrayna arasında bu sahədə mümkün əməkdaşlıq hər iki ölkə üçün geosiyasi və iqtisadi baxımdan mühüm addım hesab olunur.
23:13 30.04.2025
Oxunuş sayı: 659
