Özbəkistanda mülki dron zavodu tikiləcək
Özbəkistanda yaxın zamanlarda mülki təyinatlı pilotsuz uçuş aparatlarının (PUA) istehsalı üçün yeni zavod fəaliyyətə başlayacaq. Layihənin 2025-ci ilin sonunadək reallaşdırılması planlaşdırılır. Bu təşəbbüs pilotsuz aviasiya sistemləri sahəsində ixtisaslaşan “Gələcəyin Nəqliyyatı” (“Транспорт будущего”) şirkəti tərəfindən həyata keçiriləcək.
Crossmedia.az xarici mediaya istinadən bildirir ki, zavodun əsas məqsədi mülki sahədə istifadə olunan dronların istehsalı və regionda bu texnologiyanın inkişafını təmin etməkdir. Şirkətin baş direktoru Yuri Kozarenko bu barədə “Innoprom. Mərkəzi Asiya” adlı Beynəlxalq Sənaye Sərgisinin plenar iclasında çıxışı zamanı danışıb. O bildirib ki, bu müəssisə Özbəkistanda innovativ texnologiyaların tətbiqi və pilotsuz sistemlərin inkişafında mühüm rol oynayacaq.
Kozarenko çıxışı zamanı qeyd edib: “Biz 2025-ci ilin sonunadək Özbəkistanda mülki dron istehsal edən bir müəssisə yaratmağı planlaşdırırıq. Bu zavod müasir tələblərə cavab verəcək və ölkənin texnoloji potensialına töhfə verəcək.” O həmçinin əlavə edib ki, yeni zavod regionda yüksək texnologiyalı sənayenin formalaşmasında önəmli rol oynayacaq və yeni iş yerlərinin yaradılmasına da səbəb olacaq.
Mütəxəssislərin fikrincə, bu layihə həm Özbəkistanın iqtisadi inkişafına, həm də Mərkəzi Asiyada texnoloji əməkdaşlığa təkan verə bilər. Layihənin reallaşması üçün tərəfdaş axtarışları, texnoloji transfer və kadr hazırlığı kimi mərhələlərin də nəzərdə tutulduğu bildirilir.
Fatimə Nəbiyeva
11:30 29.04.2025
Oxunuş sayı: 7652
