Pezeşkianın Bakıya səfəri: İran-Azərbaycan münasibətlərində yeni səhifə açılır
İranın Prezidenti Məsud Pezeşkianın Bakıya planlaşdırılan səfəri, İran-Azərbaycan münasibətlərində normallaşma prosesinin sürətlənməsi baxımından mühüm əhəmiyyət daşıyır. Səfər, İkinci Qarabağ müharibəsindən sonra iki ölkə arasında yaşanan gərginliyin ardınca başlanan diplomatik təşəbbüslərin istiqamətini müəyyən edəcək.
Crossmedia.az xəbər verir ki, bu barədə “Anadolu” agentliyi məlumat yayıb.
Bildirilib ki, iki ölkə arasındakı münasibətlər 2020-ci ildən sonra ciddi şəkildə pozulmuşdu. İrandan Qarabağ bölgəsindəki qondarma rejimə yük daşımaları, İranın sərhəddə keçirdiyi hərbi təlimlər və Tehranın “Azərbaycan İsraili bölgəyə gətirib” iddiaları rəsmi Bakının sərt reaksiyasına səbəb olmuşdu. Azərbaycanın cavab tədbirləri çərçivəsində İran sərhədində hərbi təlimlər təşkil olunmuş, İranın dini liderinin Bakı ofisi bağlanmışdı.
Gərginlik 2023-cü ilin yanvarında Azərbaycanın Tehrandakı səfirliyinə edilən silahlı hücumla daha da artmışdı. Hadisə nəticəsində səfirliyin mühafizə rəisi həyatını itirmiş, iki əməkdaş yaralanmışdı. Azərbaycan hadisəni terror aktı kimi qiymətləndirmiş və səfirliyi təxliyə etmişdi. İran tərəfi hücumun şəxsi motivlə törədildiyini bildirsə də, hücuma görə məsuliyyət daşıyan şəxs hələ də edam edilməyib.
Bütün bu hadisələrdən sonra Azərbaycanda İranın casus şəbəkələrinə qarşı əməliyyatlar aparılıb, İran hərbi təyyarələrinin sərhəddə uçuşları isə rəsmi Bakının narahatlığına səbəb olub. Azərbaycan Xarici İşlər Nazirliyi vətəndaşlarına İrana səfər etməməyi tövsiyə etmişdi.
Qeyd olunub ki, buna baxmayaraq, son dövrlərdə tərəflər münasibətlərin normallaşdırılması üçün razılığa gəlib, diplomatik səyləri artırıb və yüksək səviyyəli təmasları davam etdirib: “İranın müsbət siqnalları və təhlükəsizlik təminatları fonunda Azərbaycan Tehrandakı səfirliyinin fəaliyyətini bərpa edib. Pezeşkianın səfəri, bu normallaşma prosesinə yeni dinamika qazandırmaqla yanaşı, iki ölkə arasında qarşılıqlı etimadın bərpası üçün yeni imkanlar yarada bilər”.
Nigar Rəhimova
16:18 27.04.2025
Oxunuş sayı: 1424
