Türk dövlətləri üzrə elmi-sosioloji tədqiqat layihəsinin nəticələri açıqlanıb
“Türk Barometri 2024 - Türk Dövlətlərində Təhsil və Elm Sahəsində Əməkdaşlıq: Mövcud Reallıqlar və Gələcəyə Baxış” adlı elmi-sosioloji tədqiqat layihəsinin nəticələri açıqlanıb.
Crossmedia.az xəbər verir ki, nəticələr barədə Bakıda Türk Akademiyası və Sosial Tədqiqatlar Mərkəzinin birgə təşkilatçılığı ilə keçirilən beynəlxalq konfransda məlumat verilib.
Qeyd edilib ki, Prezident İlham Əliyev Azərbaycanın xarici siyasətinin prioritetlərini müəyyən edən zaman türk dünyasının gücləndirilməsi və türk dövlətləri ilə əlaqələrin inkişafı əsas istiqamətlərdən biri hesab edilir.
Türk Dövlətləri Təşkilatının himayəsində yaradılan Beynəlxalq Türk Akademiyası tərəfindən "Türk Dünyası 2040 Vizyonu" sənədində göstərilən hədəflərə uyğun olaraq, üzv ölkələr arasında hər il "Türk Barometri" adlı genişmiqyaslı beynəlxalq tədqiqat həyata keçirilir. Bu tədqiqatın Azərbaycan üzrə icraçısı Sosial Tədqiqatlar Mərkəzidir.
Ötən il Mərkəzin iştirakı ilə aparılan “Türk Barometri 2024: Türk Dövlətlərində Təhsil Sahəsində Əməkdaşlığa Münasibət” adlı tədqiqatın nəticələrinə dair hesabatda elm adamlarının, müəllimlərin və təhsil siyasətini formalaşdıran şəxslərin baxışları nəzərə alınaraq türk dövlətlərində təhsil və elm sahəsində əməkdaşlıqla bağlı mövcud yanaşmalar təhlil edilib.
Bundan əlavə, tədqiqat çərçivəsində ortaq təhsil və elm siyasətinin formalaşdırılması, türk dövlətləri arasında ortaq tədris proqramlarının hazırlanması, akademik, müəllim və tələbə mübadilə proqramlarının təşkili, elmi tədqiqat layihələrinin həyata keçirilməsi, eləcə də təhsil proqramlarının hazırlanması istiqamətlərində birgə əməkdaşlığa dair ictimai meyillər araşdırılıb.
Türk dövlətlərindən olan tədqiqat qrupunun üzvləri nəticələri konfrans iştirakçılarına təqdim edib.
Türk Akademiyası adından layihənin ümumi koordinatoru professor Əbülfəz Süleymanlı araşdırma nəticələri haqqında geniş məlumat verərək tədqiqatın türk dövlətləri elm və təhsil əlaqələrinin çox tərəfli aspektlərini əhatə etdiyini qeyd edib.
Konfransın yekununda təhsil siyasətləri, akademik mübadilə proqramları, birgə tədqiqat layihələri və institusional əməkdaşlığın inkişaf etdirilməsi ilə bağlı geniş fikir mübadiləsi aparılıb.
11:40 21.04.2025
Oxunuş sayı: 767
