“Şərtlər yerinə yetirilmədiyi halda sülh sazişi imzalanmayacaq” - ŞƏRH
Ermənistan Xarici İşlər naziri Ararat Mirzoyanın son açıqlamaları Cənubi Qafqazda sülh prosesinin gələcəyinə dair yeni suallar doğurub. Nazir bildirib ki, İrəvan Bakı ilə ya sərhəddə, ya da hər iki tərəf üçün məqbul olan üçüncü ölkədə sülh sazişi imzalamağa hazırdır. Politoloqlar bu mövqeni Ermənistanın növbəti oyunu kimi dəyərləndirsələr də, Azərbaycanın irəli sürdüyü iki əsas şərtin – Ermənistan Konstitusiyasında ərazi iddialarının ləğvi və Minsk qrupunun buraxılmasının yerinə yetirilib-yetirilməyəcəyi hələ də açıq qalır.
Mövzu ilə bağlı politoloq Elçin Xalidbəyli Crossmedia.az-a açıqlamasında qeyd edib: "Sülh sazişinin imzalanması mövzusunda həm Ermənistanın Xarici İşlər naziri Ararat Mirzoyan, həm də ümumilikdə Nikol Paşinyan hakimiyyəti siyasi manipulyasiya ilə məşğuldur.
Rəsmi Bakının prinsipial mövqeyi ondan ibarətdir ki, sülh sazişi yalnız iki şərt yerinə yetirildikdən sonra imzalana bilər.
Bu şərtlərdən birincisi, Ermənistan Konstitusiyasında Azərbaycana qarşı ərazi iddialarını ifadə edən müddəaların dəyişdirilməsidir. İkinci şərt isə Minsk qrupunun ləğv olunmasıdır.
Ancaq nə qədər qəribə olsa da, Paşinyan hakimiyyəti bu iki şərtdən yan keçməklə sülh sazişinin imzalanmasına hazır olduğunu bəyan edir. Bu isə hiyləgər və məkrli bir davranışdır. Çünki Rəsmi Bakı dəfələrlə bəyan edib ki, bu iki şərt yerinə yetirilmədiyi təqdirdə sülh sazişinin imzalanması mümkün deyil.
Rəsmi İrəvan bundan sui-istifadə etməyə çalışır, özünü bütün dünyaya guya sülh sazişini imzalamağa hazır olan tərəf kimi təqdim edir və sazişin gecikməsinə görə günahı Azərbaycan tərəfinin üzərinə atır.
Əsas məqsəd isə odur ki, sülh sazişi bu iki şərt yerinə yetirilmədən, beynəlxalq təzyiqlər vasitəsilə imzalansın. Lakin bütün bunlar yenə də erməni xəyallarından başqa bir şey deyil.
Rəsmi Bakı birmənalı şəkildə bəyan edib ki, qeyd olunan iki şərt yerinə yetirilmədiyi halda sülh sazişi imzalanmayacaq. Çünki Ermənistanın Konstitusiyasında Azərbaycana qarşı ərazi iddiaları mövcuddur. Əgər bu iddialar davam edirsə, sülh sazişinin heç bir əhəmiyyəti qalmır və belə olan halda onun imzalanmasına da ehtiyac yoxdur.
Əgər Ermənistan həqiqətən səmimi şəkildə sülh sazişini imzalamağa hazırdırsa, onda bu istiqamətdə real addımlar atmalı və şərait yaratmalıdır. Bu da yalnız həmin iki şərtin icrası ilə mümkündür.
Sülh sazişinin imzalanmasına nail olmaq istəyirsə, Ermənistan Konstitusiyasındakı Azərbaycana qarşı olan ərazi iddialarından imtina etməli və Minsk qrupunun fəaliyyətinin dayandırılmasına razılıq verməlidir".
Zəhra Məmmədova
16:45 15.04.2025
Oxunuş sayı: 12814
