Azərbaycanın elə bir bölgəsi yoxdur ki, orada yol infrastrukturu yenilənməsin - Deputat
Prezident İlham Əliyevin rəhbərliyi ilə ölkəmizdə həyata keçirilən məqsədyönlü regional inkişaf siyasəti nəticəsində Azərbaycanın bütün bölgələrində infrastruktur layihələri ardıcıl şəkildə reallaşdırılır, kənd və şəhər yaşayış məntəqələrinin siması köklü surətdə dəyişir. Dövlət başçısının Naxçıvanda Prezidentin yeni səlahiyyətli nümayəndəsini və bir sıra rayon icra hakimiyyəti başçılarını qəbul edərkən səsləndirdiyi fikirlər bu istiqamətdə görülən işlərin miqyasını və davamlılığını bir daha nümayiş etdirir.
Prezident qeyd edib ki, bu gün ölkənin bir çox bölgələrində kənd yollarının 70–80 faizi təmir olunub və keyfiyyət baxımından müasir tələblərə cavab verir. Magistral və şəhərlərarası yollar tamamilə yenilənib, kənd yollarının tikintisi üçün isə hər il dövlət tərəfindən kifayət qədər vəsait ayrılır. Dövlət başçısı həmçinin vurğulayıb ki, şəhər və kəndlərdə içməli su, suvarma və digər sosial infrastruktur layihələrinin icrası ardıcıl şəkildə davam edir. Yeni su anbarlarının və kanalların tikintisi, məktəblərin, xəstəxanaların və idman obyektlərinin inşası Azərbaycanın regionlarının hərtərəfli inkişafına mühüm təkan verir.
Prezident İlham Əliyevin sözlərinə görə, bütün bu nailiyyətlər dövlət proqramlarının planlı şəkildə icrası və dövlət büdcəsindən ayrılan vəsaitlərin səmərəli istifadəsi nəticəsində əldə olunub. Bu siyasət, eyni zamanda, ölkənin sosial-iqtisadi tərəqqisini, vətəndaş rifahının yüksəldilməsini və bölgələr arasında bərabər inkişafın təmin olunmasını hədəfləyir.
Məsələ ilə bağlı Milli Məclisin deputatı Azər Badamov Crossmedia.az-la öz fikirlərini bölüşüb: "Dövlət başçımız yeni təyin olunmuş icra hakimiyyəti başçılarının qəbulu zamanı ölkədə magistral və şəhərlərarası yolların tamamilə yenidən qurulduğunu, bir çox bölgələrdə isə yolların 70-80 faizinin artıq təmir edildiyini qeyd etdi. Qeyd etmək lazımdır ki, 2004–2024-cü illər ərzində Prezident İlham Əliyevin imzaladığı sərəncamlar əsasında rayonlararası və yerli əhəmiyyətli yolların yenidən qurulması və bərpası istiqamətində genişmiqyaslı işlər həyata keçirilib. Belə ki, bu dövrdə ölkə üzrə yeni salınmış və yenidən qurulmuş yolların ümumi uzunluğu (respublika əhəmiyyətli, yerli əhəmiyyətli və Bakı şəhəri yolları daxil olmaqla) 20 770 kilometrdən çox olub. Bunun təxminən 6 783 kilometri respublika əhəmiyyətli, 11 480 kilometri yerli əhəmiyyətli, 2 455 kilometri isə Bakı şəhərinə aid yollar təşkil edir. 2003–2023-cü illər ərzində isə ölkədə 2 210 yaşayış məntəqəsini birləşdirən rayondaxili avtomobil yolları üzrə təxminən 5 100 kilometr uzunluğunda yeni yollar tikilib və yenidən qurulub. Bu gün demək olar, Azərbaycanın elə bir bölgəsi yoxdur ki, orada yol infrastrukturu yenilənməsin. Yolların yenidən qurulması ölkənin sosial-iqtisadi inkişafını sürətləndirir, sahibkarlıq subyektlərinin fəaliyyətinə və vətəndaşların rahat hərəkətinə geniş imkanlar yaradır. Dövlət başçımızın infrastruktur məsələlərinə toxunması onu göstərir ki, artıq bir çox rayonlarda bu sahə ilə bağlı əsaslı problemlər aradan qaldırılıb və yeni təyin olunmuş icra başçılarının əsas diqqəti effektiv idarəetmə və səmərəli fəaliyyətə yönəlməlidir".
Deputat, həmçinin Prezidentin hər bir məmurun qarşısında qoyduğu ən mühüm vəzifə xalqın məmnunluğunu qazanmaq olduğunu qeyd edib: "Əminik ki, həm yeni təyin olunmuş, həm də fəaliyyətdə olan icra başçıları dövlət başçımızın tapşırıqlarından nəticə çıxararaq onlara göstərilən yüksək etimadı əməli fəaliyyəti ilə doğrultmağa çalışacaqlar".
Elmir Heydərli
16:19 13.11.2025
Oxunuş sayı: 5037
