Yeni təyin olunan icra başçıları rayon sakinlərinin arasında olmalıdırlar - Partiya sədri
Prezident İlham Əliyevin rəhbərliyi ilə son illərdə ölkəmizdə həyata keçirilən genişmiqyaslı islahatlar dövlət idarəçiliyinin bütün səviyyələrində şəffaflığın təmin edilməsinə, sosial ədalətin qorunmasına və vətəndaşların dövlətə inamının daha da möhkəmlənməsinə xidmət edir. Dövlət başçısının Naxçıvanda Prezidentin yeni səlahiyyətli nümayəndəsini və bir sıra rayon icra hakimiyyəti başçılarını qəbul edərkən səsləndirdiyi fikirlər bu siyasətin ardıcıl və məqsədyönlü şəkildə davam etdirildiyini aydın göstərir.
Prezident İlham Əliyev çıxışında vurğulayıb ki, yerlərdə hələ də mövcud olan və əhalini narahat edən bəzi problemlərin köklü şəkildə həlli vacibdir. Dövlət başçısı qeyd edib ki, bu məsələlərin əsasında sosial ədalət prinsipi dayanmalıdır — hər bir bölgədə, hər bir kənddə insanlar ədalətin bərqərar olduğunu görməli və buna inanmalıdırlar.
Ölkə rəhbəri, həmçinin xatırladıb ki, vaxtilə bəzi mərkəzi icra orqanlarında və bölgələrdə müşahidə olunan neqativ hallar, məmur özbaşınalıqları və qanunsuz göstərişlər cəmiyyətin dövlət idarəçiliyinə inamına mənfi təsir göstərib. Lakin son illərdə aparılan kadr və struktur islahatları nəticəsində bu sahədə ciddi dönüş yaranıb, məmur korpusu əhəmiyyətli dərəcədə sağlamlaşdırılıb.
Prezidentin sözlərinə görə, artıq heç bir məmura mərkəzdən qanunsuz göstəriş verilməyəcək və qanunsuz varlanmanı öz məqsədinə çevirən şəxslər məsuliyyət qarşısında cavab verməli olacaqlar. Dövlət başçısı xüsusilə torpaqdan səmərəsiz istifadə, torpaqların zəbt edilməsi və kateqoriyasının dəyişdirilməsi kimi hallara toxunaraq qeyd edib ki, əkin-biçin üçün yararlı torpaqlarda bəzi məmurların şəxsi imarətlər inşa etməsi yolverilməzdir və belə qanunsuzluqlara qarşı ciddi tədbirlər görüləcək.
Bu çıxış bir daha sübut edir ki, Prezident İlham Əliyevin rəhbərliyi ilə aparılan siyasətin mərkəzində vətəndaş maraqları, ədalət prinsipi və dövlətə sadiq, məsuliyyətli idarəçilik anlayışı dayanır.
Mövzu ilə bağlı Ədalət Partiyasının sədri Mütəllim Rəhimli Crossmedia.az-la öz fikirlərini bölüşüb: "Mövcud idarəetmə sistemində icra hakimiyyəti başçılarının kifayət qədər böyük yeri var. Yerli idarəetmədə icra hakimiyyətlərinin səlahiyyətləri imkan verir ki, onlar bütövlükdə rəhbərlik etdikləri rayonlara hakimlik etsinlər. Bəziləri isə bundan sui-istifadə edərək bütün rayonu özünün biznes obyektinə çevirir. İcra başçılarının torpaq sahələrini, obyektləri özəlləşdirməsi, şəxsi istehsal təsərrüfatını qurması ilə bağlı çoxsaylı faktlar məlumdur. Bu hərəkətlər özü ilə bərabər korrupsiya və rüşvətxorluq halları da doğurur. Nəticədə rayon sakinlərinin sosial, iqtisadi vəziyyəti pisləşir, hüquqları kütləvi şəkildə pozulur. İcra başçılarının hüquq -mühafizə orqanlarına təsir etmək imkanları olduğundan, onların da ədaləti qorumasına imkan vermir. Beləliklə, yerlərdə xalq arasında narazılıqlar yaradılır. Prezident də yeni icra başçıları təyin edərkən diqqəti məhz bu məsələyə yönəldib. Onlara vəzifə öhdəliklərini yerinə yetirməyə, etibərdən sui-istifadə etməməyə çağırdı. İcra başçıları qanunla onlara verilmiş səlahiyyətlərdən istifadə edərək dövlətin güclənməsinə çalışmalıdırlar. Onların yaxşı fəaliyyətini rayon üzrə ödənilən vergilərin həcmi, qurulan istehsal sahələri, hər il açılan iş yerlərinin sayı, sosial yardım alanların azlığı təşkil etməlidir".
Partiya sədri ümumən bu sahələrdəki uğurları icra başçıları arasında bir yarışa çevirmək lazım olduğunu bildirib:
"Yeni təyin edilənlər xalqın icra başçılarına qarşı itmiş inamını bərpa etməyə çalışmalıdırlar. Buna görə də kabinetlərindən çıxıb rayon sakinlərinin arasında olmalıdırlar. Onların qayğıları, istəkləri, problemləri ilə maraqlanmalıdırlar. Qanunsuz fəaliyyət göstərdikləri təqdirdə bir gün onların da qapısını xüsusi xidmət orqanlarının döyəcəyini bilməlidirlər".
Elmir Heydərli
16:29 13.11.2025
Oxunuş sayı: 1471
