Paşinyanın diplomatik manevri: Sülh, yoxsa siyasi makiyaj?
“Əgər biz Qarabağ münaqişəsi səhifəsini bağlayırıqsa – Qarabağ münaqişəsi ilə məşğul olan strukturun mövcudluğunun nə mənası var?” – Ermənistanın baş naziri Nikol Paşinyan bu fikirləri ölkə parlamentindəki çıxışı zamanı səsləndirib. O, Azərbaycanla sülh sazişi və ATƏT-in Minsk qrupunun buraxılması barədə bəyannamənin eyni vaxtda imzalanmasını təklif edib. Paşinyanın sözlərinə görə, iki ölkə arasında sülh sazişi layihəsi artıq razılaşdırılıb və tərəflər indi sənədin imzalanma mərhələsinə keçid üzərində düşünürlər.
Ermənistan rəhbərliyi sülhə dair zaman-zaman müsbət bəyanatlar versə də, real addımlar atmır. Bunu politoloq Əli Zülfüqaroğlu məsələ ilə bağlı Crossmedia.az-a açıqlamasında deyib: “Əslində, Paşinyanın əsas məqsədi sülh sazişini yalnız Ermənistanın maraqları çərçivəsində imzalamaq, daha sonra isə Azərbaycanın əsas tələblərini danışıqlar masasından tədricən çıxarmağa nail olmaqdır. Bu, xüsusilə Ermənistan Konstitusiyasında Azərbaycana qarşı ərazi iddialarının dəyişdirilmədən saxlanması ilə bağlı aydın şəkildə özünü göstərir”.
“Azərbaycanın Xarici işlər naziri Ceyhun Bayramov Antalya Diplomatiya Forumunda açıq şəkildə bildirdi ki, Ermənistan Konstitusiyasında Azərbaycanın ərazi bütövlüyünə qarşı iddialar aradan qaldırılmadıqca və ATƏT-in Minsk qrupu rəsmən buraxılmadıqca sülh sazişi imzalanmayacaq. Bu, Azərbaycanın konkret və tamamilə aydın mövqeyidir. Ermənistan əgər doğrudan da sülh sazişinin imzalanmasını istəyirsə, Azərbaycanın bu iki əsas şərtini qeyd-şərtsiz yerinə yetirməli və sonda sülh masasına əyləşməlidir”, - deyə politoloq vurğulayıb.
Politoloqun fikrincə, Ermənistan manipulyativ addımlar ataraq, əslində sülh prosesindən yayınmağa çalışır: “Beynəlxalq ictimaiyyətə sanki sülh tərəfdarı olduğu mesajını verməyə cəhd edir, amma reallıqda bu belə deyil. Ermənistan bu münasibətini dəyişməyincə və Azərbaycanın haqlı tələblərinə adekvat reaksiya verməyincə sülh sazişinin imzalanması qeyri-mümkün görünür.
Azərbaycan hətta Zəngəzur dəhlizi məsələsini, demarkasiya və delimitasiya proseslərini sülh sazişindən sonraya saxlamaqla, bu sənədin imzalanmasında nə qədər istəkli olduğunu və tez bir zamanda sülhün təmininə çalışdığını nümayiş etdirib.
Azərbaycan haqlı olaraq hesab edir ki, sülh sazişinin dayanıqlı və hüquqi cəhətdən təmin olunması üçün Ermənistan Konstitusiyasında yer alan ərazi iddiaları tam şəkildə ləğv edilməlidir. Çünki bu iddialar saxlanıldığı təqdirdə, Ermənistanda gələcəkdə hakimiyyət dəyişikliyi baş verərsə, yeni qüvvələrin revanşist siyasətə qayıtmaq ehtimalı yüksəkdir. Bu isə sülh sazişini hüquqi və siyasi baxımdan təhlükə altına sala bilər.
Azərbaycanın bu məsələyə yanaşması həm beynəlxalq hüquqa tam uyğundur, həm də gələcəkdə yeni gərginliklərin qarşısını almaq baxımından zəruridir”.
Sonda politoloq vurğulayıb ki, Ermənistan doğrudan da sülh istəyirsə, Azərbaycanın haqlı tələblərini qeyd-şərtsiz qəbul etməlidir: “Əks təqdirdə, atılan bəyanatlar sadəcə zaman qazanmaq və sülhə mane olmaq məqsədi daşıyır. Ermənistanın qeyri-səmimi və qeyri-konstruktiv mövqeyi dəyişməyincə, sülh sazişi real görünmür”.
Həmayıl Şükürlü
14:44 15.04.2025
Oxunuş sayı: 11874
