Slovakiya Baş naziri Fitsonun səhhətində problemlər yaranıb
Slovakiyanın baş naziri Robert Fitso ötən il ona qarşı törədilən sui-qəsd cəhdi zamanı aldığı yaralar səbəbindən son üç gündə səhhətində problemlər yaşadığını bildirib. Bu barədə baş nazir Facebook vasitəsilə həmvətənlərinə etdiyi videomüraciət deyib.
“Sui-qəsd cəhdi zamanı aldığım yaralar son üç gündə məni narahat edir. Bu səbəbdən iş proqramımın bir hissəsini ləğv etməli oldum”, – deyə Fitso vurğulayıb.
Qeyd edək ki, 2024-cü il mayın 15-də Fitsoya qarşı Slovakiyanın qərbində yerləşən Handlova şəhərində sui-qəsd törədilmişdi. Təqaüdçü yazıçı Yuray Çintula baş naziri güllələyib, daha sonra o, həbs olunub və hazırda məhkəmə hökmünü gözləyir. Fitso hadisə zamanı bir neçə ciddi xəsarət almış, bir neçə əməliyyat keçirmiş və yalnız 2024-cü ilin iyulunda vəzifəsinə qayıda bilmişdi.
Baş nazir daha əvvəl – aprelin 10-da isə əlavə əməliyyatlara ehtiyac duyduğunu açıqlamışdı.
08:26 14.04.2025
Oxunuş sayı: 868
