Qazaxıstan, Özbəkistan və Türkmənistandan Türk dövlətlərinə xəyanət? - Deputat danışdı
Qazaxıstan və Türkmənistan Türkiyənin Güney Kıbrıs adlandırdığı, rəsmi adı Kipr Respublikası olan ölkədə səfirlik açıb. Qazaxıstanın Kiprdə ilk səfiri olan Nikolay Jumakanov etimadnaməsini prezident Nikos Xristodulidisə təqdim edərkən deyib ki, Qazaxıstan Kipr Respublikasının beynəlxalq səviyyədə tanınmış sərhədləri daxilində suverenliyini və ərazi bütövlüyünü qətiyyətlə dəstəkləyir. Məlum olduğu kimi, Kipr Respublikasının beynəlxalq səviyyədə tanınmış sərhədləri bütün adanı əhatə edir. Türkmənistanın Kiprdə ilk səfiri Toyli Komekov bu ölkənin xarici işlər naziri Konstantinos Kombos ilə görüşüb. Görüşdən sonra X sosial şəbəkəsində paylaşım edən Kombos Türmənistanın Kiprdə səfirlik açmasını “ikitərəfli münasibətlərdə mühüm dönüş nöqtəsi” kimi qiymətləndirib. İlk olaraq 2024-cü il dekabrın 19-da Özbəkistanın səfiri (həmçinin, İtaliyadakı səfir) Abat Fayzullayev öz etimadnaməsini Kipr prezidentinə təqdim edib. Bu ölkələr Kipri daha əvvəl tanısalar da, Türkiyə ilə münasibətlərə zərər verməmək üçün ora səfir təyin etməmişdilər.
Qazaxıstanın və Türkmənistanın atdığı bu addım türk dünyasında ciddi narahatlıq yaradıb.
Bu barədə Crossmedia.az-a danışan Milli Məclisin deputatı, politoloq Elçin Mirzəbəyli söyləyib ki, Qazaxıstan, Türkmənistan və Özbəkistanın Kiprin yunan tərəfinə səfir təyin etmələrinin əsası, qənaətimə görə 2024-cü ilin yanvar ayında, Qlobal Gateway İnvestor Forumunda qoyulub: "Xatırladım ki, sözügedən forumda Aİ tərəfindən Mərkəzi Asiya dövlətlərinə dəstək və investisiya üçün 10 milyard avronun səfərbər olunması barədə razılığa gəlinib.
Ola bilsin ki, həm maliyyələşdirmə ilə bağlı razılaşmanın, həm də Aİ-Mərkəzi Asiya Sammitinin ön şərtlərindən biri də Cənubi Kiprlə bağlı olub. Bəlli olduğu kimi, 2022-ci ildə Şimali Kipr Türk Cümhuriyyəti Türk Dövlətləri Təşkilatına (TDT) müşahidəçi üzv qəbul olunub. Bundan sonra Avropa İttifaqına (Aİ) üzv olan Cənubi Kipr və Yunanıstan bu qərarın sabotaj edilməsi üçün ən müxtəlif səviyyələrdə hərəkətə keçiblər. Görünən odur ki, Qazaxıstan, Özbəkistan və Türkmənistan "balans yaratmaq" və Aİ başbilənlərinin, çox güman ki, Cənubi Kipr və Yunanıstanın müraciəti əsasında "yaranan narahatlıqlarını" aradan qaldırmaq üçün belə bir addım atmaq qərarına gəliblər. Şübhəsiz ki, bu bir ehtimaldır və zənnimcə, əlavə şərhə də ehtiyac yoxdur. Azərbaycan nümunədir - dostluqda da, qardaşlıqda da, cəsarət və qətiyyətdə də. Ümid edirəm, bu nümunə nə zamansa Türk Dünyasının ideoloji "onurğa sütunu"nu təşkil edəcək və bu gün tərəddüd edənlər Türk Dövlətləri Təşkilatının gələcəyinə Azərbaycanın strateji baxış bucağından baxa biləcəklər".
Kənan Novruzov
12:09 10.04.2025
Oxunuş sayı: 14909
