Rusiyanın "başı hələ çox ağrıyacaq": Gürcüstan üzərindən ikinci cəbhə açıla bilər
Gürcüstanın Baş naziri İrakli Kobaxidze bildirib ki, “dərin dövlət” adlandırılan qüvvələr Avropa strukturlarına Ukraynada hərbi əməliyyatların davam etdirilməsi barədə göstəriş verib. Onun sözlərinə görə, bu qüvvələr həmçinin Gürcüstandakı anti-dövlət təşkilatlarını da Avropa İttifaqı vasitəsilə maliyyələşdirir. Kobaxidze qeyd edib ki, Gürcüstan Ukrayna ssenarisindən yayınaraq ikinci qarşıdurma cəbhəsinin açılmasına imkan verməyib və bu, “dərin dövləti” qəzəbləndirib.
Əslində bunlar kifayət qədər ciddi iddialarıdır. Doğrudanmı, Ukrayna "Avropanın çaldığı havaya oynayır"? Əgər belədirsə, məqsəd nədir və ABŞ-nin israrla müharibəni bitirmək səyləri nə ilə nəticələnəcək?
Bu barədə Crossmedia.az-a danışan politoloq Rəşad Bayramovun fikrincə, hazırkı mövqeyin bir neçə səbəbi var: "Birincisi, hazırda ABŞ ilə problem yaşayan Avropa üçün özünün təhlükəsizliyi ən vacib məqamdır. ABŞ-nin uzun müddət təhlükəsizliyini təmin edən Avropa hazırda yeni təhlükəsizlik sisteminin qurulması istiqamətində fəaliyyətə başlayıb. Ukraynanı da Avropanın ümumi təhlükəsizlik sisteminin tərkib hissəsi olaraq gördüyü üçün və özü də müstəqil şəkildə təhlükəsizliyini təmin etmək üçün zaman qazanmaq baxımından hələ də Rusiya və Ukrayna arasında müharibənin davam etdirilməsini istəyir. Yəni sadə dillə desək, ayrı-ayrı Avropa təşkilatları və bir sıra Avropa dövlətləri düşünür ki, əgər Avropa İttifaqının (Aİ) və ümumiyyətlə Avropanın öz təhlükəsizlik sistemini qurmaq üçün 5 il vaxt lazımdırsa, bu müddət ərzində Rusiyanın başının Ukraynaya qarışması bu zamanı və bu imkanı tanıya bilər. Bu, məsələnin birinci tərəfidir".
R. Aydının sözlərinə görə, məsələnin ikinci tərəfi ondan ibarətdir ki, hazırda oyundan kənarda saxlanılan və Ukraynanın taleyinin ABŞ və Rusiya arasında həll olunduğunu görən Aİ Ukraynanın bölüşdürülməsində kənarda qalmaq niyyətində deyil: "Ərazilərin 20 faizinə yaxını Rusiyanın işğalı altındadır, təbii sərvətlər Rusiya və ABŞ arasında bölüşdürülüb. Aİ isə faktiki olaraq burada hər hansısa bir qazanc əldə etmir. Ona görə də indiki şərtlər daxilində müharibənin dayandırılması yox, müharibənin davam etməsi və gələcəkdə Avropa İttifaqının maraqlarını təmin edə biləcək daha münbit zamanda öz şərtləri daxilində müharibənin bitməsini istəyir. Başqa sözlə, Avropa da Ukraynanın bölüşdürülməsində başda olmağa cəhd edir. Və bu səbəblər indiki halda ayrı-ayrı Avropa təşkilatlarına təbii ki, Ukraynada müharibənin bitməsi onlar üçün arzuolunmaz hala gəlir".
Politoloq üçüncü məsələnin humanitar fəaliyyət adı altında milyardlarla vəsaitin bölüşdürülməsinin təmin edildiyi olduğunu vurğulayıb: "Biz bilirik ki, Avropada ayrı-ayrı donor təşkilatlar, müvafiq aldıqları vəsait hesabına Ukraynada müxtəlif fəaliyyətlər həyata keçirirlər.Müharibənin bitməsi həm də donor təşkilatlara əlavə maliyyə maxinasiyası imkanlarını məhdudlaşdırır. Yəni heç kimə sirr deyil ki, bu günkü dövrdə hər hansı bir donor təşkilat Ukraynada bir layihə təşkil edir. Dövlətdən aldığı vəsaitin heç də hamısını həmin vəsaitə xərclənməli olduğu yerə xərcləmir. Təbii ki, burada maliyyə maxinasiyaları, pulların yeyintisi və s. var. Müharibənin dayandırılması onları əlavə qazancdan edəcək deyə bu istiqamətdə də Ukraynada müharibənin davam etdirilməsi ilə bağlı işlər görür".
Müsahibimiz bir neçə istiqamətdə Rusiyanın başının hələ uzun müddət silahlı münaqişələrə qatılması üçün böyük bir plan aparılışdığını, Ukraynanın isə bunun birinci hissəsi olduğunu bildirib: "Bir neçə il Ukraynada davam edən müharibədən sonra ikinci cəbhənin açılması üçün Gürcüstan istiqamətində həmlələr edildi. Lakin hakimiyyət Avropadan gələn bu sifarişlərdən imtina etdiyi üçün biz şahid olduq ki, böyük etiraz aksiyaları keçirilməyə başladı".
O, əsas məqsədin Gürcüstan istiqamətindən də ikinci cəbhənin açılmasının təmin edilməsi olduğunu vurğulayıb:
"Moldova üzərindən oyun oynanılması ilə bağlı cəhdlər edildi. Bu günlər Rusiyanın maksimum şəkildə uzun müddət ərzində münaqişələrə cəlb olunması Avropa İttifaqının təhdid olunmasından çıxana qədər zəifləməsi üçün təbii ki, bu istiqamətdə planlar var. Amma indiki halda Gürcüstan hakimiyyətin özünü təsdiq etdiyi və möhkəmləndiyi bir vaxtda düşünmürəm ki, Aİ bu istiqamətdə irəliləyişə nail ola bilsin".
Fatimə Məmmədova
14:20 08.04.2025
Oxunuş sayı: 9636
